World Cup khel lo tur Romero

Goalkeeper nei ṭha tawk lo nia sawi ṭhin Argentina chuan buaina lian tak an nei. FIFA World Cup huna an si ban nghak tur Sergio Romero chu a khup hliam vangin Russia-ah a inlan ve thei dawn lo.

Argentine Football Association chuan thuchhuah siamin, "Thawhlehni khan Sergio Romero chuan a khup ding lamah hliam a tuar a, zai a ngaih dawn avangin squad aṭanga a chhuah a ngai," tiin Russia an pan ve loh tur thu an sawi. An ram khawpui Buenos Aires-a training session an neih laiin hliam hi a tawk a ni.

Kum 31 mi Romero a awm loh takah chuan Chelsea keeper Willy Caballero chu inkhel bul ṭan tura ngaih a ni a, ram tana match ruk khel tawh Tigres UANL goalkeeper Nahuel Guzman chu squad-ah a hming ziah luh a ni thung ang.

World Cup hnuhnung berah khan Romero hi Argentina-in final an luh theih nana player pawimawh a ni a, mahse extra time-ah Germany midfielder Mario Gotze ke aṭanga ball chhuak a dan loh avangin pahnihna an nih phah–ram tana a hun tawn san lai ber a nih phah tawh hial mai thei.

World champion vawi hnih ni tawh Argentina hi Group D-ah Iceland, Croatia leh Nigeria te nen an awmkhawm a, an match hmasa ber atan June 16 hian Russia khawpui Moscow-ah Iceland nen an intawng ang–Iceland hi kumin World Cup khel tur zinga ram te ber an ni a, football inelna lian berah hian an vawi khat inlanna tur a ni. An inbuatsaihna hnuhnung atan June 9 hian Israel nen friendly match an khel dawn.

A pawi!
Argentina number 1 goalkeeper Sergio Romero hi Premier League club lian Manchester United lamah chuan tun hnaia khawvel keeper ṭha bera ngaih David de Gea a tluk loh avangin bench-ah a hun tam zawk a hmang ṭhin.

Season liamta khan match pakuaah a inlan a, heng zinga pariat chu cup competition-ah niin, league-a an dinhmun a chian vek tawh hnua an match hnuhnung berah khan a inlan bawk. 2016-17 Europa League champion an nih ṭum erawh kha chuan player pawimawh a ni a, manager Jose Mourinho-a'n De Gea aia a chhawr rim zawk a ni.

Man United tan inlan tam lo mah se Argentina tan erawh rinrawl a ni phak tho a, hliam tawk lo se la chuan Russia-ah pawh a inlan ngei ang. Goalkeeper tam tak zinga shot stopper langsar tak ni phak hi a kum ngaihtuah chuan atan World Cup hnuhnung ber ni thei tura ngaih a ni a, hliam a tuar hi amah leh an ram tan channa nasa tak a tling.

A thlak tur
Tlarhma lamah Lionel Messi hoin hming langsar hlir rem khawm thei mah se, ram lian dang nena khaikhin ralah chuan Argentina hian goal veng tur an nei ṭha tawk lo. Romero thlaktu tur hi Willy Caballero a ni a, kum 36 mi Caballero hian ram tan match hnih chiah a la khel–season liamta khan Premier League match thum a khel a, inelna hrang hrangah match 13 chiah a inlan phak.

Boca Juniors aṭanga bul ṭan, Manchester City tana match 23 khel tawh Caballero hi City leh Blues tan rinrawl ni phak lo mah se keeper vantlang tak a ni. Feet 6 leh 1 inch-a sang niin football a khelh hun chhungin club paruk tana a inlan zat belhkhawm chu match 356 a ni.

Caballero thachhang dawl tur hian River Plate keeper Franco Armani an la nei a, ram tana la inlan ngai lo Armani hi World Cup khel tura koh ni mah se coach Jorge Sampaoli tan a chunga rinna nghah ngam a harsa thei. An koh thar tur Guzman pawh kum bithliah lamah ram tan tawnhriat nei tawh mah se senior team tana match pawimawh khel phak lo a nih avangin an innghahna tur chu Caballero a ni ang.