England kan champion thei ang - Kane

World Cup Russia 2018 khel tur England captain thar Harry Kane chuan world champion an nih theih thu a sawi.

Kum 24 mi striker chuan, "Kan champion thei ang. Kan champion a nih loh chuan result ṭha dang a awm thei lo," a ti a, pakhatna aia hniama lungawi a tum lo.

Kane hian season hman zawh takah khan Tottenham Hotspur tan inelna hrang hrangah goal 41 a khung a, Thawhlehni khan England captain a nih tur thu tih chian a ni.

A theih alawm!
Spurs striker chuan, "Khawvela inelna lian ber a nih avangin World Cup nomawi chawi hi mangrama man loh theih a ni lo. Kan champion theih ka ring a, eng team pawh an champion thei.

"Engvangin nge nomawi kan chawi thei lo ang, tia ka sawi ngawt ang? Kan champion thei tih ka hria a ni. A pawimawh ber chu kan rilru puthmang hi a ni a, ka thiltihna apiangah hnehtu nih ka duh ṭhin.

"Ka ṭhiante pawhin nomawi chawi an duh a, World Cup meuh hi chuan theihna zawng zawng nena beih a phu a ni. World champion nih hi kan mitthla ṭheuh tawhin ka ring a, kan tan chuan tun hi hun ṭha a ni," a ti.

Liverpool en ula...
Kane chuan World Cup nomawi chawi tur zingah beisei ni lo mah se an champion theih thu a sawi. Premier League-a season li chhung goal 20 chuang a zawna khung tawh striker chuan, "Tu rin mah kan hlawh lo a, mahse tun season hi thlir rawh u.

"Liverpool-in Cham-pions League final an khelh hi tumahin an ring lo a, Sir Alex Ferguson hunlaia Manchester United kha thlir ula, team naupang tak an ni. Mahse, hun rei tak chhung Premier League an thunun tho.

"Player naupang tak awmkhawm kan nih hi chhuanlam chi a ni lo a, thil ṭha thlenna tur a ni zawk thei. Nomawi kan chawi theih ka ring a, a aia hniam zawkah chuan kan lungawi lo ang," tiin a sawi.