Dortmund boss thar Lucien Favre

Borussia Dortmund-in an kalphung an la thlak lo–coach hming langsar leh hriat hlawh sa aiin an budget mil tawk coach bawk an la leh ta a, Lucien Favre chu kum 2020 thleng atan an coach ni turin an lalut.

Kum 60 mi coach hian season hman zawh takah khan Ligue 1 club Nice a enkawl a, French club hi a chhuahsan hnuah Bundesliga lam hawiin Dortmund hi a zawm ta a ni.

Dortmund hian December khan Thomas Tuchel thlak tura an lakluh Peter Bosz chu beisei ang result a neihpui loh avangin a hna aṭangin an ban a, Swiss coach Favre hian season tawp thleng atana manager hna chelh lailawk Peter Stoger a thlak.

Everton nen pawha sawizawm lo hlawh tawh Favre hi Bundesliga-ah a mikhual hran lo a, Hertha Berlin leh Borussia Monchengladbach a lo enkawl tawh avangin a tlangnel nghal ang.

Favre chuan, "BVB hi Europe-a club ngaihven hlawh ber pawl an ni reng a, Bundesliga-a kir hi ka nghakhlel em em a ni," a ti a, thawhhona chu an tana thil pawimawh a nih tur thu a sawi bawk.

Dortmund sports director Michael Zorc chuan, "A theihna leh thiamna sang tak avangin kan rinna a hlawh chhuak a ni," tiin an coach thar chungchang a sawi ve bawk.

Favre hian Nice a enkawl hmasak berah Ligue 1-ah pathumna a nihpui a, Champions League a inhlankaipui. Tun season-ah erawh pariatna dinhmun bak an luah thei lo.