Emery-a'n hriatreng tur siam a tum

Arsenal chuan nimin khan Unai Emery chu an manager thar a nih thu an puang. Arsene Wenger thlaktu Emery contract hi chiang taka tarlan a ni rih lo a, khawtlang media-te chuan kum thum daih niin, pound maktaduai 15 hlawh tur angin an ziak.

Sevilla a enkawl laia Europa League nomawi a zawna vawi thum chawi thei Emery hian a hna thar chu phurawm a tih thu a sawi a, North London club tan theihnghilh tawh ngai loh tur hlimna thlen a tum thu a sawi. Spanish club a enkawl laia hlawhtlinna a chan tawhna Europa League-ah season thar hian Gunners a kaihhruai ang.

Kum 46 mi Emery hian tun season tawp rualin Paris Saint-Germain tana a contract a hmang zo a, a pawh sei loh avangin a duh lam a hawi thei a. Arsene Wenger thlak tura manager thar zawng Arsenal nen hun rei lote chhungin inremna an siam thei a, Premier League parukna hi season tharah champion pui a tum dawn a ni.

Spanish manager Emery chuan, "Arsenal hian stadium ropui tak an nei a, club an kalpui dan leh player naupang zawkte tana hmun ṭha an siamsak dan hi ka duhzawng tak a ni. Chona thar hmachhawn tur zinga ka tel thei hi ka lawm a, Arsenal hmangaihtute tan hun hlu leh hriatreng tur siamsak ngei ka tum ang," a ti a, a club thar hi khawvela football club ropui berte zinga mi a nih thu a sawi bawk.

An manager thar chungchang sawiin Arsenal chief executive Ivan Gazidis chuan, "Unai hian football zin kawngah

sulhnu ṭha tak tak a nei tawh a, player naupang zawk chher hriam chungin inkhel hmuhnawm a chhawp chuak thei. A tawhrimna leh a inpekna te kan thlirin Arsenal enkawl turin a ṭha tawk a, hmalam min panpui ngei kan ring," a ti.