Seeded chang phak lo tur Serena Williams

World number 1 hlui Serena Williams chu kumin French Open-ah seeded player 32 zingah a tel phak dawn lo. Tun season chhunga Grand Slam pahnihna Roland Garros hi May 27, Pathianni aṭangin khelh ṭan a ni ang.

Kum 36 mi Serena hian nikum khan a fa hmasa ber a hring a, thla ruk zet a chawlh hnuah a rawn kir leh–world ranking lamah 453-na zetah a tla hniam hman. Indian Wells leh Miami Open-ah inlan mah se beisei a phak lo a, hliam vangin Madrid leh Rome Open aṭangin a inhnukdawk zui bawk.

French Tennis Federation chuan thuchhuah siamin, "Roland Garros-ah player 32 te chu seeded an ni dawn a, seeding hi world ranking chhuak thar ber mila siam a ni ang," tiin Grand Slam vawi 23 champion tawh Serena chu an duhsak bik dawn loh thu an sawi.

Vawi hnih a champion tawhna French Open-ah Serena hian duhsak a hlawh rih lo a ni mai thei a, grass court inelna lian Wimbledon-ah erawh seeded zingah a tel phak a nih pawhin a mak lo ang. All England Club thuneitu lam chuan Serena chu a sulhnu leh a dinhmun avangin duhsak phu bik nia an hriat thu an lo sawi tawh a ni.