Real kan ni a, hmasawn zel kan duh - Zidane
Champions League final chu May 26, Inrinni zan dar 12:15 hian Olimpiyskiy National Sports Complex, Kiev-ah Real Madrid leh Liverpool ten an khel dawn. Los Blancos manager chuan, "Real kan ni a, hmasawn zel kan duh," tiin nomawi chawi ngei an tum thu a sawi.
Real Madrid hian Borussia Dortmund, Tottenham Hotspur leh Apoel FC te nen awmin English club an hneh loh avangin pahnihna nichungin group stage an thleng. Knockout stage chinah erawh club lian an nihna a lang a, Los Blancos hian French champion Paris Saint-Germain, Italian champion Juventus leh German champion Bayern Munich hnehin final an thleng a, an kalkawng thlir chuan nomawi inchuhna hi a awlsam letling ber tura ngaih theih a ni.
Nomawi duha tuihal
Real Madrid hian Champions League nomawi vawi 12 an chawi tawh a, Zidane-a hnuaiah a zawnin vawi hnih an chawi tawh a, tun ṭum hi an champion leh chuan French manager hnuaiah a zawnin vawi thum an chawi dawn tihna a ni a. Amaherawhchu nomawi an chawi hnem tawh avangin champion duhin an tuihal tawk lo tih a awm ve bawk.
Hemi chungchanga zawhna chhangin Zidane chuan, "Kan khingpui tur hian eng ang chiahin nge champion an duh chu ka hre lo a, amaherawhchu chiang taka ka sawi ngam chu nomawi duha kan tuihalna hi a la ngai reng. Real Madrid kan ni a, hmasawn zel kan duh a. Nomawi chawi belh zel turin kan theihna zawng zawng kan chhuah ang," tiin a sawi.
Liverpool chungchang
Real boss Zidane chuan, "Team ṭha tak a ni a, keini ang thoin final thlen hi an phu a ni. Final atan uluk taka kan inbuatsaih a ṭul a, kan khingpui chak lohna laiah tak kan nawr theih a ṭul dawn. Match khat lek a ni a, neutral ground-ah khelh a ni dawn. Kan tawnhriat vang hian kan dinhmun a ṭhat phah lo. Football inkhel dang ang tho a ni a, khelmualah chak kan duh tih lantir a ṭul a ni," tiin Reds aia an dinhmun a ṭhat bik loh thu a sawi.
Zidane chuan sawi chhunzawmin, "Final a ni a, nomawi kan duh ve ve. Nikumah kan champion a ni thei a, anni erawh kum 11 chhung final an lut tawh lo pawh a ni thei a, hei hian kan inhelh hmabakah min pui lo. Inkhel hmuhnawm tak phochhuah kan tum dawn a ni," a ti.
Chak lo = Hlawhchham?
Los Blancos hian pathumna nichungin season an khar a, an champion lo a nih chuan nomawi an chawi lo tihna a ni a, an hlawhchham tihin a sawi thei bawk.
Amaherawhchu, Zidane chuan, "Chak lo pawh ni ila kan hlawhchham tih tur chu a ni lo. Copa del Rey-a kan muala kan chak lo kha chu ka sawi tawh ang kha kan hlawhchham a, kan vanduai ve bawk. Chutihrualin hmasawn tur chuan chetsual chang hi a awm a ngai a ni," tiin an sawi.
French manager chuan a nu leh pate zirtirna aṭangin thil reng reng a êng zawnga a thlir ṭhin thu a sawi a, Liverpool manager Jurgen Klopp a dahsang thu a sawi tel bawk.