Spain coach tan contract thar

World Cup boruak leng vel karah Spain chuan an coach Julen Lopetegui chu kum hnih chhung atan a contract an pawhsei sak a, La Roja (Spain sawina) hi kum 2020 thleng a enkawl ang.

Euro 2016 khan Spain hi last 16 aṭangin hnawhchhuah an ni a, hemi hnu lawk hian manager Vicente del Bosque chu a bang. Manager tawnhriat ngah tak thlak tur hian kum 51 mi hi lakluh a ni a, match 18 a enkawl tawhah vawi 13 hnehna chanpuiin vawi nga an khingpui an inhnehtawkpui a, a record hi a chhuanawm rih hle.

Porto coach hlui chuan, "Contract thar kan ziah theih avangin ka lawm takzet a, kan hma huna thil lo thleng turte ngaihtuahin kan phur takzet bawk a ni. Ka hna ka chhunzawm zel theih dawn avang hian ka lawm takzet," a ti.

Lopetegui hian Euro Under 19 leh Under 21-ah Spain youth team a lo champion pui tawh a, contract a pawhsei thu hi World Cup-a a koh loh langsar Alvaro Morata, Marcos Alonso, Cesc Fabregas, Hector Bellerin, Pedro, Javi Martinez, Marc Bartra, Ander Herrera leh Juan Mata te ho tan chuan thu hriat nuam a ni lo ang.