Iniesta chungchanga Xavi lehkha ziak

Andres Iniesta-a'n tun season tawp rualin Barcelona a chhuahsan a, khawvelin midfielder a hmuh tawh zinga ropui ber pawl hi mittui nen Nou Camp chuan an thlah.

Barcelona mai ni lo, football khawvela midfield inkawp fuh bera sawi ni ṭhin chu Xavi leh Iniesta inkawp kha a ni a, khawvelin Spanish midfielder pahnih hi hmuhnawm ti takin a thlir ṭhin.

Xavi-a'n Qatar lamah football nunchan a chhunzawm tawh a, a ṭhianṭha Iniesta-a'n Barca a chhuahsan meuh chuan lehkhathawn lungkuai leh ngaihnawm tak a ziak a, Iniesta ropuina hrilhfiahtu ṭha tak a ni.

Xavi lehkhathawn:
"Andres-a inkhel ka hmuh hmasak ber kha ka la hre reng mai.

Kei chu youth team-ah ka awm a, ani erawh kum naupang zual awmna team-ah a awm thung. Club ami ṭhenkhat ka hnenah an rawn kal a, 'Xavi, player pakhat, khawvela a ṭha ber la ni tur kan nei a ni. A khelh dan chu i khelh dan nen a in ang em em mai lehnghal' tiin min rawn hrilh.

Mahse, Andres inkhel ka hmuh hmasak ber khan keimah leh keimah hi, 'Eng thil nge thleng ta hi, he nau hi ka khelh dan anga khel a ni lo. Kei aiin a danglam zawk a nih hi,' tiin ka inhrilh a ni.

Kei aiin ngaihtuahna sen a thiam zawk a, ball a thiam zawk a, mual sir lamah kalin ball a cross thei bawk. Chu chu ka style nen in ang lo tak a ni. Kei chu jersey number 4 player ka ni a, Pep leh Busquets te nen kan khelh dan hi chu a inpawl mah zawk.

Ni e, ani chuan four, eight, six emaw 10 ang hial pawhin a khel thei a, a taksa chet dan vel enin player thiam chungchuang bik a ni dawn tihah hai tur a awm lo.

A ke pahnih a hmang thiam a, ni e, hei hi tunlai chhanah chuan thil awlsam tak angin a lang a ni mai thei a, mahse a hunlai kha chuan thil danglam bik a ni. A ke dinglam hmangin ball a thunun a, a ke veilam hmangin a chet lak leh dan tur a hril ṭhin.

Mak ka tih ber zawk chu a kea ball khawih fuh miah lo pawh khanin a taksa chetzia hmanga ball a thunun thei kha a ni. Andres inkhel lai i en a nih chuan show hmuhnawm tak a chang zel ṭhin.

Dak chhuak reng chungin a khel a, ball a hloh ngai lo. Coach hnuaiah thil tam tak kha chu kum tam kan zir a, mahse kum tam kan zir thil ṭhenkhat kha a tan chuan thil thlawn pek, zirchawp ve ngai lo a ni. A chang chuan, 'Keini aiin kum liin a naupang a, mahse pianpui thiamna a nei bik a nih si hi' tiin ka ngaihtuah fo ṭhin.

Andres hi ka tan chuan Spanish football-a player ṭha ber a ni a, a chungchang thu hi a mal malin sawi dawn ila a ropui lutuk a ni. Entawntlak, midang hrethiamtu, team player, hnehna chan duh leh khelmuala hruaitu ṭha a ni.

Heng ka sawi zawng zawng hi in hrethiam ang em? Hmun harsaah, tih ngaihna a awm loh laiin player tam tak chuan ball changtu nih an duh lo. Andres erawh a danglam a, engtiklai pawhin ball chan a duh ṭhin.

Andres hi chuan ball chan reng a duh a, player dangin, 'ni lo, kei chu ball min pe suh,' an tih laiin ani erawh a rawn kal a, 'ball min pe rawh,' a ti ṭhin thung. Chu chu a khelhpuite tan chuan malsawmna a ni a, chu chu mi ropui mizia chu a ni a, hruaitu dik tak hrilhfiahna a ni bawk.

Hruaitu zawiawi tak, mahse amah ang hruaitu awm si lo ang hi a ni. Kei chu ball pass tu ka ni a, mahse he ka hna puitlin tur hian Andres, Leo leh Busi te ka mamawh ṭhin. Ka khelhpui tawh azawnga khelhpui nuam leh ṭha ber an ni.

Anni hi chuan eng anga dinhmun harsaah pawh beiseina min siamsak ṭhin. Andres hian engtinnge a tih bik ṭhin ka hre lo a, mahse ka talbuai apiangin min chhanhim turin a lo awm ṭhin.

Andres nen chuan khelmualah inbiak kan mamawh ngai lo a, au chunga a awmna hmun min hrilh ka ngai lo. A awmna tur chu ka hre hmai a, kum 10 chuang kan khelhdun avangin in man tawn turin ṭawngkaa inbiak kher kan mamawh lo.

A taksa chet dan vel chu inbiak dan ṭha ber a ni. A chang chuan inkhelh lai hian a che vel hi hmuhnawm ti takin kan thlir ṭhin a, engtinnge a tih bik tih hi hmuhnawm ti takin kan en ṭhin. Thil theih loh nia lang hi ṭha takin a chhuah tlat ṭhin a ni.

Football a nih chuan Andres tan hian theih loh a awm lo ni maiin a lang a, a duh duh dan hian a leu kual vel mai ṭhin a ni ber. Midfield laia a hlim tluk zetin mual sir lamah pawh hlim takin a khel mai a, zirtirtu ṭha, zirtirtu diktak a ni.

Andres hi mi ṭhenkhat chuan player te, chak lo leh nem tak niin an sawi ṭhin a, mahse a inkhel in en chuan chu chu a nih lohzia in hmu ang. A rilru huaisenna hi fak tlak a ni a, hun harsaah pawh a hnual ve ngai lo.

A chhungte hlata awm hrehawm a ti ṭhin a, mahse han zawt chiah ula, kha hrehawmna a tawrh zawng zawng khan a tihlawm zawk zia a hrilh ang che u. Tuin nge hetiang hian Barca a mangṭha thei ang tih ngaihtuah thiam ang? A rilru huaisen tak chuan tun dinhmun hi a hruai thleng a nih hi.

Andres hi Iker Casillas ang a ni a, anni pahnih hi chu veng rengtu Angel bik nei ang mai an ni. A pawimawh lai ber hian goal/save an nei leh mai ṭhin.

Andres hi Barcelona leh Spain tan kan khelhpui a, Stamford Bridge leh Johannesburg-a a hnathawh kha en let mai rawh u. A goal khung kha en ula, Angel pakhat venhimna hnuaia awm bik player lo tan chuan tih theih a ni lo. Chu chu Andres chu a ni.

Mi ṭhenkhatin kan khelh dun theih an rin loh thu an sawite kha ka hre reng ṭhin. Hei hi Barcelona chu a ni a, ngaihdan tam tak awmna hmun club a ni. Player tharum ngah tak bulah ai chuan themthiamna nei bik player bula khelh nuam ka ti zawk a, Barca-in tharum ngah player kan mamawh thu sawi a nih apiangin Andres, Leo leh Busi hi en mai turin ka hrilh ṭhin.

Johan Cruyff-a'n a lo sawi tawh angin football khel tura tharum ṭha ber chu thluak a ni. Andres nen hian ngawichawi tak kan ni a, hei vang hi a ni ang kan in man em em–khelmuala kan theihna pholan hi kan duh ber a ni.

Club-in player pathum an la a nih pawhin ka buai lo. Ni e, chung player thar ka elpui turte chu peseta (Spanish pawisa) pound maktaduai 250 chuang man a ni a nih pawhin Barcelona player ka ni thei, tih hi ka pholang ang.

Hei tak hi player naupang tak a nih lai pawha Andres rilru puthmang chu a ni. Busquets pawh khan Yaya Toure nen hmun an inchuh lai khan he rilru chiah hi a pu a ni.

Hetianga rilru puthmang paukhauh nei lote chu an hlawhtling ngai lo. Duhthlan tur pahnih chiah a awm: Kan tih angin huaisen takin bei la, a nih loh chuan chance nei miah lo tura inngai chungin beidawnna ruamah tlu lut rawh.

Entirna pakhat kan la chhuak teh ang. South Africa-a World Cup kan khelh hma kha, training ground-ah 'Noooooo' tia Carles Puyol au ri ka hria a, ka hawikir nak chuan mittui tla chunga Andres-a'n khelmual a chhuahsan lai ka hmu a.

Hliam dam hlim chauh a ni a, hliam dangin a tlakbuak leh a! World Cup pawh a khelh theih kan ring lo. Mahse, a rilru huaisen leh paukhauh tak avang khan World Cup-ah a inlan leh thei a ni.

UEFA Super Cup 2009-a kan chak ṭum, Monaco dressing room-a kan thusawi kha tun thleng hian ka la theihnghilh thei lo.

'Andres kan mamawh che, kan mamawh takzet che a, i tel loa khelh reng hi thil harsa a ni, Barcelona hian i tel loa khelh a thiam lo. Player danglam bik i ni a, i awm loh chuan he team hi a talbuai ṭhin. Andres ring rawh, ring mai rawh, thudik kan hrilh che a nih hi, kan mamawh che,' kan ti a, Andres kha khatih lai khan a rilru a buai em em a, khatih hun chhung khan thil ṭha lo tinreng kha a chungah a thleng a ni ber.

Mahse, a rilru huaisen tak leh a chhungte puihnain engkim kha a hneh a ni. A chang chuan Andres ropuina hi thu hmang maia hrilhfiah chi niin ka hre lo, a thil tih reng reng hi awlsam tak angin a lang a, midang tan tive mai thei tura inngaihna a puttir ṭhin.

Mahse, chu chu thil theih a ni lo. A thiltih ang hi tumahin an ti ve thei lo. Khelmualah chuan mi danglam daih a ni a, chutah tak chuan a nihna tak pholanin a awm ṭhin a, chu chu a pianpui thil ve reng a ni.

A keah ball a awm loh hi chuan a hlim tak tak thei lo a, match lianthamah vawi khat chauh pawh a khelh chhiat hi ka la hre ngai lo. Thinrim taka a au hmel hmuh tur ka la nei lo a, tun thleng hian chutiang chuan ka la hmu lo.

Sawisel tur a nei a nih chuan midang zah tak chungin a sawi mai a, inhnial buaina a awmin a au bengchheng ngai lo a, a duhdan takin team chu a kaltir mai ṭhin. Chu chu thil awlsam tak a ni lo, a chhan chu player zawng zawng hian mahni induhtawkna kan nei vek si a.

Champions League 2006-a inhliam vanga ka inlan theih loh kha ka la hre reng mai. Mahse, defensive midfielder angin mawhphurhna zawng zawng kha a la a, Lisbon leh Milan-ah ṭha takin a khel a nih kha.

Final kan lut a, mahse Rijkaard khan inkhel bul ṭantu zingah a dah tel tlat lo. Starting XI-ah a tel dawn lo tih ka hriat khan Puyol ka bia a, 'Engtinnge Andres hi starting XI-ah a tel loh theih? Engatinge Andres hi inkhelh tir a nih loh?' tiin ka zawt mawlh mawlh a.

'Ka hre bik lo, ka hre bik lo' tih zawng chu Carles a hnen aṭanga chhanna ka hmuh chhun a ni. Thudik tak chu hei hi a ni, kha thutlukna kha coach khan eng vanga siam nge a nih tumahin an hre lo a, tumahin an hrethiam hek lo.

Lisbon leh Milan-a player pawimawh ni si kha bench-ah dah a ni a, mahse second half-a luhtir a nih khan engkim a thlak danglam ta a nih kha. Larsson leh Eto'o te nen khan an thawkho ṭha hle a ni.

Zep nak emaw, a thinlung chhung takah chuan a lungawi lo a, mahse a duh hmasak ber chu team tana hnathawh a ni.

A thinlung chhung thinrimna chuan khelmualah ṭha zawkin a khelhtir a, player dang chu ni se an ti tau ang a, lungawi lohna an lantir ang. Mahse, ani chuan engmah sawi loin a theihna chu khelmualah a pholang mai a, coach-in thutlukna a siam sual zia chu a lantir mai a ni. Chu chu a ni Andres chu.

Football level sang berah ka khel tawh lo a, hei vang hian top level-a inkhelh hlutzia kha ka hria a, Barcelona tana inlan thei nih ropuizia pawh ka hria.

Andres pawh hian a chhuah hunah ka thil sawi hi a hrethiam ang.

Nomawi chawi theih zawng zawng a chawi vek a, chutiang ropuina hlawh chhuak tur chuan a khel ṭha em em zel bawk. Mi zawng zawngin an zah a, khawvel hmun hrang hrangah ngaisangtu a nei vek a ni.

Barcelona chhuahsan tura a phu ang takin a chhuahsan a, a chungchang thu hi tumahin a ṭha lo zawnga sawi tur an hre lo.

Nakinah chuan a career-a a hun tawn ropui tawh takte hi a la hrethiam ang a, mi zawng zawng rinhlelhna a thaibo sakzia te a la hria ang. Chu chu a ni, Andres chu.