Game 4 zawhah Rockets = Golden State ; Zirtawpni zing dar 6:30-ah game 5

Golden State Warriors-in Oracle Arena-ah an dinhmun an siam ṭha thei lo a, game 4-ah Houston Rockets lakah 92-95 in an chak lo. Western Confe­rence finals a nung thar a, series-ah 2-2 in an inhnehtawk mek.

Toyota Center, Houston-ah May 25, zing dar 6:30 hian game 5 khelh a ni dawn. GSW-in an an hun ṭha neih an bawhpelh avangin Rockets 'home'-ah pressure tam zawk nen an lenluh a ṭul ang.

Hma inhruai chhawk
Golden State-in quarter hmasa berah 28-19 in hma an hruai a, quarter hnihnaah Rockets rawn tho chhuakin 34-18 in an hneh thung a, mikhual team hian halftime-ah 53-46 in hma an hruai.

Third quarter-ah GSW an che ṭha zawk a, he quarter bikah Houston point neih zat 17 let thawk 34 an neih avangin quarter khat khelh hmabakah point 10 in an chungnung.

Hun pawimawhah mikhual an che ṭha zawk a, quarter tawp berah Rockets-in 25 points an neih laiin GSW-in point 12 chiah an neih theih avangin game 4-ah Houston-in 95-92 in hnehna an chang.

Iguodala tel lohna
Kum 34 mi Andre Iguodala chu game 3-a James Harden khup leh a ke vei lam an intauh­na lamah hliam a tuar a, a inlan thei lo. Golden State forward Iguodala hi MRI leh X-ray ah a dinhmun a ṭha a, amaherawhchu coach Steve Kerr-a'n game 5-ah an chhawr theih tur leh tur loh a la sawi chiang thei lo.

GSW hian Iguodala awm lo chungin tlarhnung lamah an fimkhur tawk lo a, coach Kerr-a game plan a fuh tawk lo pawh a ni thei a, eng pawh chu ni se chak thei dinhmuna an din hman avangin an result-ah a lawm lo ang.

Golden State tan Stephen Curry erawh a che ṭha tho a, point 28 neiin Kevin Durant aiin point khatin a nei tam. Curry chuan, "Kan hmahruaina zat thlir kha chuan dinhmun ṭha taka in dah thei tur kan ni a, amaherawhchu team ṭha tak kan hmachhawn avangin minute 48 chet ṭhat a pawimawh. Chauh vanga chak lo erawh kan ni lo a, theihtawp kan chhuah a ni," tiin chhuanlam siam a tum lo.

1-na Rockets
Rockets hi regular season-a pakhatna kha an ni miau a, Oracle Arena-ah champion lai chu minute 12 chhungin point 12 chauh an neihtir a, an thawhhona ṭha chu an chakna chhan pakhat a ni.

Amaherawhchu, playoff chinah chuan chak tur chuan star neih a ngai a, James Harden chuan point 30 neiin Chris Paul chuan point 27 a nei ve bawk. Fourth quarter-ah hian Rockets field goal pasarih zinga panga chu Chris Paul-a thawh a ni a, hun pawimawh innghahna thlak a ni.