Iran-in squad an puang

Manchester United assis­tant manager hlui Carlos Queiroz enkawlna hnuaia khel tur Iran chuan player 24 awmna squad an puang a, rin loh takin koh zingah Kaveh Rezaei a tel lo. Player hi pakhat la paih leh tur a ni.

Kum 26 mi striker hian Belgian club Charleroi tan a khel mek a, season hman zawh takah khan match 39 khelin goal 16 ngawt khung mah se Iran squad-a hmun chan nan a tawk zo lo.

Iran hi tlarhmaah erawh an ngaihtuahawm dawn lo. Rubin Kazan striker Sardar Azmoun, Dutch club ṭha Heerenveen forward Reza Ghoochannejhad leh season hman zawh taka Dutch league top scorer ni tur AZ Alkmaar tana goal 21 khunga assist 14 neitu Alireza Jahanbakhsh te an kawl.

Hetihlai hian Greek club Panionios tana Israeli club Maccabi Tel Aviv an hma­chhawn avanga ram tana inlan thei lo tura hrem tawk pahnih Masoud Shojaei leh Ehsan Haji Safi te chu koh zingah an tel a, hrem an nihna fans zinga duh lohna a tam avangin ram tan hian koh an ni.

Hneh loh tawng loin Iran hi World Cup khel turin inpetkai mah se an hna a awlsam dawn lo a, Spain, Portugal leh Morocco te nen group khatah an awmho.

Goalkeepers: Alireza Beyranvand (Persepolis), Rashid Maza­heri (Zob Ahan), Amir Abedzadeh (Maritimo).
Defenders: Ali Gholizadeh (Saipa), Majid Hosseini (Esteghlal), Ramin Rezaeian (Ostende), Mohammad Reza Khanzadeh (Padideh), Morteza Pouraliganji (Alsaad), Pejman Montazeri (Esteghlal), Milad Mohammadi (Akhmat Grozny), Roozbeh Cheshmi (Esteghlal).
Midfielders: Saeid Ezatollahi (Amkar Perm), Masoud Shojaei (AEK Athens), Mehdi Torabi (Saipa), Omid Ebrahimi (Esteghlal), Ehsan Hajsafi (Olympiacos), Karim Ansarifard (Olympiacos)
Forwards: Alireza Jahanbakhsh (AZ Alkmaar), Mahdi Taremi (Al Gharafa), Sardar Azmoun (Rubin Kazan), Reza Ghoochannejhad (Heerenveen), Saman Ghoddos (Ostersunds), Ashkan Dejagah (Nottingham Forest), Vahid Amiri (Persepolis).