Benitez-a'n Liverpool Squad ṭha tawk a ti

Liverpool manager hlui Rafael Benitez chuan Champions League final khel tur Liverpool squad chu a hunlaia European champion a nihpui Reds squad ai khan an ṭhat zawk thu a sawi.

Kum 2005 Champions League final-ah khan Liver­pool hi AC Milan nen an inhma­chhawn a, a hunlaia team ropui Milan hi first half-ah 3-0 ngawtin ngam lo mah se comeback ropui an lantir a, an si phurh an sut vek hnuah penalty hmangin hnehna an chang.

Benitez chuan, "Ṭha takin kan hna kan thawk a ni mai a, Istanbul-a thil mak kha sawi nawn a ni fo ṭhin. Mahse, tuna Liverpool team hi an ṭha zawk a ni," a ti a, champion turin Jurgen Klopp-a nauten chance an nei sang zawkah a ngai.

Spanish manager hian 2004-10 chhung khan Liver­pool hi a enkawl a, Cham­pions League no­mawi an chawi ṭum hian player lang­sar zingah Steven Gerrard, Xabi Alonso leh Dietmar Ha­mann te an kawl.

Mahse, Spanish mana­ger chuan, "Stevie kan nei ngei a, player tawnhriat ngah leh quality sang tak Alonso leh Hamann kan nei bawk. Player thawkrim tak tak kan nei a, kan team kha a in balance em em a ni.

"Tuna Liverpool squad pawh hi team in balance tak an ni a, mahse an tlarhma pa­thum ringawt pawh hian danglamna an thlen thei. Kei chuan danglamna thlen thei player pakhat chiah ka nei a ni," a ti.

Benitez-a'n Gerrard chiah mimala team thlak danglam thei player neiah a inngai a, Klopp-a'n Mohamed Salah, Roberto Firmino leh Sadio Mane a nei thung - Salah leh Firmino ten goal 10 ve ve an khung tawh a, Mane-a'n goal kua a khung thung.

Newcastle United boss chuan sawizawmin, "Sum sen chungchang kan sawi dawn a nih chuan a hunlaia ka budget kha pound maktaduai 20 a ni a, he squad man hi chu tam tak a ni," a ti a, Istanbul-a an hnathawh kha a ropui zawkah a ngai.