Ghana-in Japan squad chingfel dawn

Asian football powerhouse Japan coach Akira Nishino chuan World Cup-a a hruai tur player 23 chu Ghana nena an inkhelh hunah a chinfel tur thu a sawi.

Japan hian May 30 khian Ghana nen friendly match an khel dawn a, thla hmasa lawka manager ni tura Vahid Halilhodzic thlaktu Nishino hian player 27 awmna squad chu a puang tawh.

Asian football-a coach langsar ber pawl chuan, "Ka team tana ṭha ber tur hriat ka duh a, Ghana hi inzir nan kan hmang dawn a ni," a ti a, player langsar ni lo tan Ghana laka khelh ṭhat a pawimawh lehzual ang.

Japan squad-ah hian player langsar tak tak Galatasaray defender Yuto Nagatomo, Southampton defender Maya Yoshida, Eintracht Frankfurt midfielder Makoto Hasebe, AC Milan midfielder hlui, Mexican club Pachuca tana khel ta Keisuke Honda, Borussia Dortmund midfielder Shinji Kagawa, Stuggart striker Takuma Asano leh Leicester City forward Shinji Okazaki te an tel.