Knock out round luh a pawimawh - Uruguay coach

World Cup khel tur Uru­­guay manager Oscar Wa­shington Tabarez chuan Rus­sia-a an thil tum hmasa tur chu last 16 luh a nih thu a sawi a, champion tura an inpeih thu a sawi tel bawk.

South America aṭanga inpet tling Uruguay hi a thlengtu Russia bakah Egypt leh Saudi Arabia te nen Group A-ah an awmkhawm a, tun hma lama an sulhnu en chuan Tabarez-a naute hi harsa lutuk loa tlang chho thei mai tura ngaih an ni.

Kum 71 mi Tabarez chuan, "A thlengtu ram hian team dang tan harsatna an thlen thei ṭhin tih chu hriat sa a ni. Russian football dan-ten an ram tan theihtawp an chhuah dawn a, ram dang pahnih pawh hi awlsam taka hneh theih tur niin an lang lo," tiin a sawi.

World cup thlirzuiin Taba­rez chuan, "World Cup-ah ram 32 an inlan dawn a, kan tel ve avangin ram ṭha 32 zingah kan tel tihna a ni. A zatve chauhin last 16 an lut chho dawn a, pawn lam aṭanga en mai aiin a chhunga luhchilh hian knock out stage luh a harsa dawn, kan thil tum hmasa atan chuan group stage paltlang a ni ang," a ti.