Raina tan French Open beiseina a tawp

Tennis inelna lian Grand Slam pali zinga pakhat French Open-ah India nula Ankita Raina chuan qualifying a khel ve phak a, mahse a match hmasa berah Russian nula Evgeniya Rodina lakah 3-6, 6-7(2) in a chak loh nghal avangin May 27 aṭanga khelh tur main draw a khel phak dawn lo.

Kum 25 mi Raina hian set khatna a hloh hnuah a insiam ṭha a, set hnuhnung zawkah hian 5-2 ngawtin hma a hruai fal hman. Mahse, game hun pawimawh vanglai takin a chefuh thei lo a, world number 83 hlui lakah hian game khat chiah a lakbelh avangin tie break khelh a ngai a, darkar khat leh minute 41 an inkhelh hnuah a vanduai zui bawk.

India nula Raina hian winners vawi 10 a vaw chhuak a, mahse unforced errors vawi 23 zet a neih avangin a tihsual ngah hi a tuar. Raina chuan, "Kan duh leh tum dan ang vekin thil a kal thei lo a, a chang chuan rilru na taka kan awm ṭum pawh a awm thei. Mahse, hnehna kan chang emaw kan chak lo a nih pawhin hmalam pana kal zel kan tum tur a ni," tiin a sawi.