Premier League - Engtin nge a kal zel dawn?

Tun season Premier League kal lai khelh zawh ngei tum a ni a, thuchhuahah erawh April 30 thleng khelh loh tur tih a ni thung. Mizote ngaihven English football inelna sang ber kal zel dan tur hi coronavirus vangin a chiang lo a, thil thlen theih dan erawh a ngaihruat theih thung.

Football Association, Premier League leh English Football League ten March 19, Ningania thuchhuah inṭawm an neih khan April chhung chu Premier League khelh a ni dawn lo tih a chiang nghal a, May thla aṭangin a beisei theih thung.

Chutihrualin May thlaah hian inelna hi an ṭan ngei ngei dawn tihna a la ni lo a, Covid-19 vanga harsatna a reh chauhin inelna hi ṭan a ni dawn. UK sorkar-in inkhelh a him tih thuchhuah a neih hunah an khel thei dawn. Nimin khan Northern Ireland-ah coronavirus vanga thi a vawi khat nan nemngheh a ni a, he thuziah lai thleng hi chuan UK hrim hrimah mi 3,269 vei awm tawhin mi 133 an thi tawh.

Prime minister Boris Johnson chuan, "June thla tawpah chuan coronavirus aṭanga fihlim lam kan pan thei tawh ang tih ka sawi lawk thei lo. Amaherawhchu Covid-19 avangin kan buai reng dawn lo - kar 12 chhung chuan kan hneh thei ang," tiin a sawi a, hemi aṭanga teh chuan May thla tira Premier League ṭan pawh hi a la beiseiawm hle.

Europe-a thuneitu sang ber UEFA chuan an hnuaia ram hrang hrang league-te an khelh zawh theih nan kumina European Championship khelh tur pawh nakkum atan sawn a ni tawh a. Football Asociation pawhin June 1 hmaa season zawh tur tih dan chu thlahdulin tun season league zawh hun atan biktuk an siam lo.

Chutihrualin FA hian league zawh hunah bituk siam lo mah se June 30 hmaa zawh theih erawh a pawimawh hle. June thla tawp rualin contract a tawp a, season khat aia tam contract la nei pawh July thla inṭan rualin an contract dang la neih a inṭan chiah. Tun season tawp ruala contract tawp tur phei chu kumin January 1 a inṭan chiah khan club dangah contract an ziak thei tawh a, 'official' chuan July 1 aṭangin club neitu thar an nei tawh ang.

Player contract chauh hi a ni lo - team thawmhnaw siamtu leh sponsor thlengin a inthlak dawn. Season an pawtsei a nih chuan club-in an sponsor ngai a ha tlang mai dawn a, amaherawhchu company lamin ngawih reng an duh dawn lo - a hma thei ang berin advertisement an ṭan thum ang.

Season thar hi August-ah ṭan ṭhin a ni a, Champions League leh Europa League qualifying phei chu July thlaah an khel ṭan ṭhin. UEFA thlirna aṭang chuan June thla chhunga inelna zawh chu duhthusam a ni.

May 1 aṭangin inelna ṭan leh tur ni ta se June 30-ah inkhel a zo thei ang em tih hi zawhna chu a ni ta. Premier League-ah round kua khelh tur a la awm a, Carabao Cup final-a Manchester City leh Aston Villa te inkhelh avanga match pahnih sawn khelh tur a la awm bawk.

Champions League leh Europa League final khelh hun hi nemngheh la awm lo mah se June 27 leh June 24 a khelh turin ruahmanna siam a awm. Premier League club zingah Manchester City-in khelh tur an la ngah ber a, match 19 khelh tur an la nei. Chelsea leh Manchester United-in match 18 an khel thei bawk.

UEFA-in quarterfinal leh semifinal hi double leg-a khel loin match khat chauha an rel chuan tun season-a English club khelh zat hi a la tlahniam thei ang. Hetichung hian June 30-a zawh tur chuan hun a chep hle. Chutihrualin Liverpool-in khawmualpui pahnihah ni hnih chhungin match hnih an khel thei a nih chuan June 30-a inkhel a zawh theih lohna chhan tur a awm lo.

Premier League hi zawh ngei tumin hma la mah se a zo ngei ang em tih erawh a chiang lo. West Ham managing director Karren Brady chuan tun season hi engmah lo maiah chhiar ni mai se a duh. Hammers hi tla thei dinhmunah an din avangin ṭhenkhat erawhin fin kherek a chhuahah a ngai thung.

Chutihrualin season zawh theih dan tur ngaihtute pawhin May thla tira team-in training an ṭan loh chuan tun season hi zawh a har tur thu an sawi. Chumi zawmzia chu Premier League hi zawh tum ni mah se Karren Brady duh dan hian thil a la thleng a, Premier League hi a zo ngei dawn tih sawi theih a la ni lo.