Napoli manager thar Ancelotti

Italian manager ropui Carlo Ancelotti chuan rin loh takin Napoli a zawm a, Italian club-ah hian kum thum chhung cham turin contract a ziak.

AC Milan manager hlui hian Napoli-ah hian kum khatah pound maktaduai nga chuang a hlawh dawn niin khawthlang media te chuan an tarlang a, Serie A roreltu Juventus Lal ṭhuthleng luahlan chu a hna hmasa tur a ni ang.

Italian manager hian ram pangaah club hrang hrang a enkawl tawh a, Spain-ah chiah league nomawi a chawi lo–Napoli in beiseina an nei sang hi a mak lo.

Khawiah nge Sarri?
Ancelotti-a'n Napoli a zawm tur thu a sawi ruala zawhna awm nghal chu Maurizio Sarri-a'n khawi lam nge a pan dawn? tih hi a ni. Italian manager hian Napoli-ah kum 2020 thleng cham turin contract a la nei.

Mahse, Ancelotti an lakluh avangin Sarri a chhuak dawn tih a chiang a, Chelsea chu Italian manager nena sawizawm hnai ber a ni. Mahse, Blues hian Sarri lalut tur chuan sum an insen huai a ṭul dawn.

Sarri-a'n contract a la neih miau avangin Chelsea hian kum 59 mi la chhuak tur chuan Napoli hnenah pound maktaduai sarih an pek a ṭul dawn a, an hnena cham tura kum khat chhung atana contract la nei Antonio Conte chu zângnadawmna pound maktaduai kua an pek a ṭul bawk ang.

Sarri leh Napoli
Italian manager hian kum 2015 khan rinhlelhna karah Napoli a enkawl a, tun season-a chhuah a tum meuh chuan khawvela manager hriat hlawh pawl a ni der tawh.

Serie A Coach of the Year (2016-17) hian season hman zawh takah pawh khan Napoli hi league-ah pahnihna a nihpui a, an point hmuh zat 91 chu vanneih ṭum chu ni se champion pui tham khawpa point tam a ni. A club-in Serie A bika an point hmuh hnem ber ṭum a ni hial.

Sarri hi Chelsea nena sawizawm an nih karah sum ngah Zenit St Petersburg chuan lakluh ve an duh nia sawi a ni bawk a, mahse amah hian Russian club zawm ai chuan Stamford Bridge pan a duh zawk.

Welcome Carletto
Ancelotti sulhnu leh Napoli sulhnu thlirin Italian manager-in Napoli a zawm hi a mak a, mahse Napoli hian Sarri 'hralhna' aṭanga an sum hmuh tur hisapin Ancelotti hi an lalut niin a lang.

Milan coach hlui chuan, "Khawpui nuam taka innghat leh fans ropui tak neitu Napoli ka zawm thei hi ka lawm a ni," a ti.

Carletto tia hriat lar coach hian player a nih laiin Serie A nomawi vawi thum a chawi tawh a, coach a nih hnuah vawi khat a champion pui bawk.

Carletto sulhnu
AC Milan vanglaia an coach niin Champions League (2), Serie A (1), Coppa Italia (1), Italian Super Cup (1), UEFA Super Cup (2) leh Club World Cup (1)-ah te a champion pui. Milan aṭangin Chelsea a pan a, Premier League leh FA Cup-ah a champion. Blues a chhuahsan hnuah Paris St Germain zawmin Ligue 1 nomawi a chawi.

French club aṭang hian Real Madrid a pan leh a, Spanish club hi league-ah nomawi chawipui lo mah se Spanish Cup, Champions League, UEFA Super Cup leh Club World Cup-ah vawi khat ṭheuh a champion pui hman.

2016-17 season ṭan dawn khan Bayern Munich a zawm a, league nomawi chawipuiin German Super Cup-ah vawi hnih champion pui mah se September 2017 khan ban a ni a, German club a chhuahsan hnuah Napoli hi a enkawl leh hmasak ber tur a ni.

Mangṭha Sarri
Napoli president Aurelio de Laurentiis chuan an manager chhuak tur Maurizio Sarri thlahna thu a sawi fel der tawh.

Laurentiis chuan, "Napoli tana a hnathawh avangin Maurizio Sarri hnenah lawmthu ka sawi a, he khawpui leh khawvel hmun hrang hranga kan fan-te tana hlimna thlentu i ni.

"Mi zawng zawng ngainat turin Napoli player-te i khelhtir thei a ni. I ti ṭha e Maurizio," tiin an coach chhuak tur a thlah.