Japan lam panin Iniesta

Barcelona legend Andres Iniesta chuan Japanese club Vissel Kobe a zawm ta. Spanish midfielder contract rei zawng hi J League club chuan 'hun rei tak chhung atan' tih zawngin an tarlang a, a hlawh zat sawi ni lo mah se kum khatah pound maktaduai 22 bawr vel a hlawh dawn niin khawthlang media te chuan an tarlang.

Iniesta-a'n Kobe a zawm hma hian twitter lamah club neitu Japanese sumdawng hausa Hiroshi Mikitani nena thla an lak dun a tarlang a, "Ka ṭhian nen ka in thar kan pan dawn," tiin a ziak.

Japanese club Vissel Kobe neitu Mikitani hi Barcelona main sponsor Rakuten CEO ni bawk a ni a, "Barcelona-a a career ropui tak hnuah kan club a zawm hi kan lawm a ni," tiin Iniesta an lakluh thu hi a puang.

Kum 33 mi midfielder hian season tawp rualin Barcelona a chhuahsan a, nomawi liantham 22 a chawi hman. Japan-a a khelhna tur club erawh J-League-a parukna ni mek an ni a, season hmasa khan pakuana an ni.

Vissel Kobe hian Iniesta hma hian khawvel huap hriat hlawh player an lo lalut tawh a, a hming chu Lukas Podolski a ni. Germany international hlui hian, "Welcome," tia twitter lamah ziakin Iniesta a lo lawm ve bawk.