AB de Villiers a chawl ta
South African batsman ropui AB de Villiers chuan international cricket a chawlhsan thu a puang a, kum 34 mi hi Proteas kawr ha chungin khelmualah kan hmu tawh dawn lo.
Kum 34 mi batsman hian ram tan test match 114, one day international (ODI) match 228 leh Twenty20 match 78 a khel hman a, cricket khawvela hming langsar pawl ni reng tawh turin an ram team a mangṭha.
AB de Villiers hian South Africa pawn lamah inkhelh tumna a neih tawh loh thu a sawi a, South African domestic cricket-ah chauh a inlan tawh dawn niin a lang.
Ka chau a ni
IPL-a Royal Challengers Bangalore batsman chuan, "Tunah chuan ka chawlh hun a thleng ve ta a, dik taka sawi chuan ka chau ve tawh a ni," tiin international cricket khelh reng chu a tlin tawh loh thu a sawi.
ABD chuan sawi zawmin, "Thutlukna harsa tak ni mah se hun rei tak chhung ka ngaihtuahna ka lo seng tawh a, ṭha taka ka inkhelh theih laia chawlh hi ka duhdan a ni. Proteas tana ka khelh theih hun, duh hun leh a format ka thlan reng hi a dik lo.
"Ka theihna zawng zawng ka pe thei tawh lo a nih chuan penchhuah loh mai hi ka duhdan chu a ni," a ti a, South Africa tana khel reng turin a ṭha tawk tawh loah a inngai.
Mi ropui chu
De Villiers hian 2004 khan England lakah test series khelin international cricket-a a inlan hmasak ber a ni a, 2005-ah ODI series-ah a vawi khat nan a inlan chhunzawm bawk.
South African batsman hian test match 114 aṭangin run 8,765 a siam a, ODI match-ah ringawt run 9577 a siam bawk–Test leh ODI-a a batting average hi 50 a tling hial.
Proteas captain hlui hian January 2015 khan West Indies lakah ball 31 lek hmachhawnin run 100 a vaw chhuak a, ODI-ah century siam tura ball mamawh tlem ber record a siam. Kum 2011 khan test-ah India hmachhawnin ball 75-ah run 100 a siam bawk a, South African player zinga test century siam tura ball mamawh tlem ber a ni.
Mr. 360 degree
ABD-a'n engti hawi zawng pawha bat a 'leu' thiam vel ṭhin avangin Mr. 360 degree tih hminglem pek a ni a, cricketer ropui Sachin Tendulkar chuan, "Khelmuala chhunga 360 degree i hlawhtlinpui ang ngeiin a pawn lamah pawh hlawhtlinna i chan ka beisei," tiin ABD hi a thlah.
Superman tia hminglem pek ni bawk hi Cricket South Africa president Chris Nenzani chuan, "South African Cricketer zinga ropui ber pawl, khawvel hmun hrang hranga cricket fan-te mit ti tlaitu a ni," a ti ve bawk.
ABD hian April khan test series-ah South Africa tan a hmel a lan a, 3-1 a series la chungin hnehna a chanpui–hei hi Proteas tana a inlan hnuhnung ber a ni ta a ni.