February thla hnuah Wawrinka a chak

Grand Slam vawi thum champion tawh Stan Wawrinka chuan February thla hnua a vawi khat nan ATP tour match a khelhah hnehna a chang ve leh thei ta a, Nilaini zan khan Swiss tlangval hian Jared Donaldson chu 6-3, 6-4 a hnehin Geneva Open nomawi a kawl lai chu humhim a tum dawn.

World number 3 hlui Waw­rinka hi a khup vei lam hliam zai a ni a, thla li chhung vel zet chu a inkhel thei tawh lo - a rawn kir hnuah pawh beisei a phak chuang lo a, tournament a khelh pathuma a match hmasa berah a tlawm vek. Tun dinhmunah world ranking lamah pawh 25-na zetah a tlahniam tawh.

Kum 33 mi Wawrinka hian hun rei tak hnuah match khel leh mah se buaina lian tham a tawk lo. Nizan khan Marton Fucsovics nen an inkhel zui leh a, he thu buatsaih lai hian result kan hre hman lo. Inelna hi French Open inbuatsaihna zinga pakhat a ni a, Pathianni zanah final khelh a ni ang.