French Open ; Clay Court inelna lian a hnai

Tennis inelna lian leh ngaihhlut Grand Slam pali zinga clay court-a an khelh awmchhun French Open 2018 chu May 27, Pathianni aṭang hian Roland Garros Stadium-ah khelh ṭan a ni dawn a, June 10-ah final khelh a ni ang–singles champion lai chu Rafael Nadal leh Jelena Ostapenko te an ni.

Inelna hi International Tennis Federation (ITF) hnuaia neih ṭhin niin, mipa leh hmeichhe singles leh doubles bakah mixed doubles neih tur a ni a, kum bithliah inelna a awm bawk ang. Court hrang hrang 22-ah zet khelh a ni dawn a, heng zingah hian Court Philippe Chatrier, Court Suzanne Lenglen leh Court 1 te chu a langsar niin, hengah hian player langsar leh match pawimawh khelh a ni ang.

Nadal bawk
French Open sawi rualin rilruah Rafael Nadal a rawn lang nghal a, vawi 10 zet champion tawh Nadal hian kuminah a vawi 11 nan nomawi chawi leh a tum dawn. Spanish tlangval hi seeded pakhatna nichungin a inlan dawn a, tun hnai thlir chuan world number 3 Alexander Zverev chu a elpui ber ni thei tur a ngaih a ni.

Clay Court inelna lian berah hian season hmasa ang bawkin Roger Federer a inlan dawn lo a, Grand Slam vawi 20 champion tawh Federer a inlan dawn loh avangin German rawlthar Zverev hi seeded pahnihna a ni ang–final hma chuan Nadal leh Zverev te an intawng dawn lo.

Player pahnihte hi tun hnaiah an khel ṭha chho dun hle a, a bik takin clay court-ah chuan player dangte tana hmachawn châkawm loh tak an ni mek–world number 1 leh 3 te hian final an khel a nih pawhin a mak lo ang. A hmawr bawktua ṭang tur chuan match ruk hnehna an chan chhoh phawt a ngai dawn a, kawng awlsam tak a ni dawn lo.

Rinkai?
Tun hnai kum 10 chhung chu Federer, Nadal, Novak Djokovic leh Andy Murray ten mipa tennis an thunun hneh hle, nomawi lian chawi theih awm chu an insem zo deuh thuak mai a ni. Kumin French Open-ah hian Federer bakah hliam dam hleithei lo Murray te an inlan dawn lo a, Serbian tlangval Djokovic hi tun hma anga ṭha kha a la ni lo bawk.

Big Four tia sawi ṭhin player ṭha pali zingah Nadal chiah hi khel ṭha tluang awmchhun a ni a, player naupang zawkte tan kawng a inhawng ve ṭana ngaih theih a ni. Chutih rualin an inkhelhna tur hmun hi clay a ni a; best of seven hmanga chak zawk zawnna a nih bawk avangin 'King of Clay' tia hming lem an pek Nadal hi rinkai ber a ni.

Amaherawhchu, kum 31 mi Nadal hi hneh theih loh a ni bik lo. Madrid Open quarterfinal-ah Dominic Thiem hneh loin a tla a, inelna a hmachhawn hnuhnung ber Italian Open final-ah Nadal hi chak lo tura ngaih a ni hman, mahse ruah sur vanga vawi hnih an chawlh hnuah Zverev a hneh let hram–Nadal hi hneh theih loh chu a ni bik lo.

Inlena lian dang US Open-a champion tawh Juan Martin del Potro leh Maric Cilic te chu rinkai zingah an tel phak a, world number 8 Thiem pawh sawi hmaih a thiang lo ang. Grand Slam la champion lo mah se ATP Masters lama sulhnu nei ṭha Zverev-a'n a vawi khat nan major title a la a nih pawhin a mak lo ang.

Hmeichhe lam
Season hmasa khan Jelena Ostapenko chuan rinkai lo zawk ni mah se Simona Halep a hneh a, Latvian tennis player zinga Grand Slam nomawi chawi thei hmasa ber a ni. Romanian nula Halep erawh major title a la lo chhunzawm zel mah se world number 1 ni chunga inlan tur a nih avangin dahsan ber turte zingah a tel phak.

Kumin French Opena mipui hmuh chak tak pakhat chu Serena Williams a ni. American star hian nikum September thla khan fa a nei a, January 2017-a khelh zawh tak Australian Open hnua a Garnd Slam khelh lehna hmasa ber tur a ni. Champion lai Ostapenko chuan, "Serena rawn kir thei tur hi a lawmawm, mi zawng zawngin a inkhel an en châk a ni," tiin a sawi.

Serena ang bawka mipui hmuh châk chu Maria Sharapova a ni dawn. Russian nula hi a inkhelh thiam piah lamah a hmel a ṭhain a pian a nalh a, tennis aṭanga a sum lakluh bakah pawn lam aṭanga hui luhte avangin hmeichhe infiammi zinga sum lalut hnem ber dinhmun luah reng ṭhin a ni.

Mahse, Sharpova hian damdawi hman phal loh a hman vangin thla 15 hrem a tuar. Hremna a hman zawh hnuah nomawi la chawi leh rih lo mah se a khel ṭha leh tawh viau a, French Open hi vawi hnih a champion tawhna a nih avangin a mikhual dawn lo.

A danglam
Clay-ah hian tennis ball hi a kal chak vak lo a, service leh volley na tak tak pawh rin aiin ball a kal na lo ṭhin. Grass court leh Hard court-te nena khaikhin chuan a ball kal vel a chak loh bakah a sawt sang duh hle. Hetiang a court dang nen ball kal dan a inan loh em avang hian tennis player ropui tak tak pawh an lo hlawhchham tawh ṭhin.

Grand Slam nomawi vawi 14 zet chawitu Pete Sampras pawh kha kum 1996 a semifinal a luh bak chu a thleng sang ngai lo. Final phei chu vawi khat mah a lut lo hial a ni. Sampras ang tho hian player ropui tak tak–John McEnroe, Frank Sedgman, John Newcombe, Venus Williams, Stefan Edberg, Louise Brough, Martina Hingis leh Virginia Wade te chuan French Open champion nomawi hi an chawi lo.

Hetih lai hian ball vaw na lo leh ball vaw vir thiam tan chuan hmun ṭha a ni ve thung. Rafael Nadal, Bjorn Borg, Ivan Lendl, Mats Wilander, Justine Henin leh Chris Evert te tan chuan he hmun hi hmun duhthusam a ni. Player ropui ṭhenkhat Wimbledon leh French Open champion kawp thei hi an tam lo hle a, Rod Laver, Jan Kodes, Bjorn Borg, Andre Agassi, Rafael Nadal, Roger Federer leh Novak Djokovic te hi he Grand Slam pahnih a champion kawp thei te an ni.