India football legend PK Banerjee a thi

1962 Asian Games gold-medallist PK Banerjee chu nimin khan kum 83 mi niin a thi a, India football legend thih chhan hi pneumonia vang a ni. Banerjee hian ram tan match 84 khelin goal 65 a khung.

P.K. Banerjee hi hun rei tak damlohna vangin a inenkawl tawh a; Parkinson's disease, dementia leh a lung lamah harsatna a nei a. March 2 aṭang khan Kolkata Hospital-ah 'life support' pek ṭan a ni a, a chhungte sawi danin nimin tlai dar 12:40 khan a chatthla.

Pradip Kumar Banerjee hi Jalpaiguri, West Bengal dai fem Moynaguri-ah June 23, 1936 khan a piang a, kum naupangte a nih laiin a patea chenna Jamshedpur-ah an insawn. Kum 15 mi lek a nihin Banerjee hi Bihar tan Santosh Trophy-ah a inlan tawh a, kum 1954 khan Kolkata-ah insawnin Aryan a zawm. Kum khat lek Aryan tana a khelh hnuin Eastern Railway-ah lutin hetah hian a hun pum a hmang.

Dhaka-a 1955 Quadrangular tournament neih a nih khan Banerjee hi India tan a khel ṭan a, kum 19 mi chauh a la ni. An hunlaia inelna ngaihhlut Asian Games-ah Banerjee hi vawi thum - 1958 Tokyo, 1962 Jakarta leh 1966 Bangkok-ah te khan India tan a khel vek a, Jakarta-a inelna neih a nih ṭum hian India a champion pui. 1960 Rome Olympics-ah India tan khelin France nen 1-1 a an inhnehtawk ṭumin goal a khung a, 1956 Melbourne Olympics-ah pawh quarterfinal-ah Australia 4-2 a hnehin player pawimawh a ni. Banerjee hian coaching hna a chhunzawm a, Kolkata club lian pahnih East Bengal leh Mohan Bagan te a enkawl a, Mariners hi season khatah nomawi pathum IFA Shield, Rovers Cup leh Durand Cup a lakpui.

Kum 1972 khan Banerjee hian India team a enkawl ṭan a, 1972 Munich Olympics qualifiying aṭangin a ṭan. India team hi kum 1986 thleng a enkawl a, hemi hnu hian Tata Football Academy, Jamshedpur-ah technical director hna chu 1991-1997 chhung khan a chelh. India football tana Banerjee hnathawh hi football thuneitu sang ber FIFA-in a hriatpui a, kum 2004 khan Centennial Order of Merit chawimawina a pe. Kum 1961 khan India infiammite tana chawimawina sang ber Arjuna Award a dawng a, 1990 khan Padma Shri chawimawina a dawng leh bawk.