TD Garden hmang thiam Celtics LeBron-a'n Cavaliers a chhan thei ang em?

Eastern Conference finals-ah Boston Celtics-in Quicken Loans Arena-ah zinin ṭum hnih an chak lo a, hemi hnu hian match hmasa pahniha an chakna hmun TD Garden-ah letin nimin zing khan 96-83 in hnehna an chang.

Celtics hian series-ah 3-2 in hma an hruai chiah a, kum 2010 hnua a vawi khat nan NBA finals khel turin vawi khat chak chiah an mamawh. Game 6 hi Inrinni zing dar 6:00 hian Cavaliers home-ah khelh a ni ang. Tukin dar 6:30 hian Houston Rockets-in Golden State Warriors an mikhual a, Western Conference finals-ah hian 2-2 in an inhnehtawk mek.

Rookie 'Tatum'
NBA-in kumin aṭangin Jayson Tatum a hmelhriat a, 'rookie' ni mah se playoff finals-ah mi thar tih reng a hriat loh.

Celtics forward Tatum hian nimin zing hian point 24 a nei a, rebounds pasarih a la bawk. Boston hi an team thawhhon a ṭha a; Jaylen Brown (17 pts), Al Horford (15), Marcus Morris (13) leh Marcus Smart (13) ten double digit an nei pha vek a. Celtics guard Terry Rozier-a'n point riat chauh a nei a, chutihrualin basket ngah lamah Cavaliers player zingah LeBron James (26 pts) leh Kevin Love (14) te chiah a tluk lo.

Kum 21 mi Jaylen Brown chuan, "Tatum-a che ṭha hi thil mak pawh a ni tawh lo. Rookie pawh a ni lo," tiin a teammate chu a thiamna aṭang chuan rookie a nih loh thu a sawi a, amaherawhchu kum 20 mi Tatum tan tun season hi a vawi khatna a nih avangin rookie erawh a ni miau si.

Tatum hi kum 1978-a Seattle player Jack Silma hnua rookie zinga playoff-a point 300 leh a aia tam khung tling thei hmasa ber a ni a, hetiang tithei parukna chauh a ni. Hei bakah hian tun ṭum hi playoff-a point 20 emaw a aia tam a neih vawi kuana a ni a, Utah Jazz rookie Donovan Mitchell leh David Robinson (1990) te a tluk pha chiah. Kum 1970 khan Kareem Abdul-Jabbar chuan playoff-ah match 10-ah point 20 emaw a aia tam a khung ve bawk.

Celtics Vs LeBron
Boston Celtics hian TD Garden-ah record an nei ṭha a, helai hmunah hian tun season playoff vawi 10 an khelh tawhah an la chak vek. Celtics hian an zinna hmunah record an nei ṭha lo a, Quicken Loans Arena-ah game 6-ah an chak lo a nih pawhin game 7 chu TD Garden-ah khelh a ni dawn a, an dinhmun a ṭha.

Nimin zingah Cavaliers an che ṭha tawk lo a, LeBron James erawhin double double a la nei pha tho. Cavs star hian point 26 neiin rebound 10 a la bawk a, game 6-ah pawh Celtics tana ven ngai tur chu LeBron tho hi a ni ang.

LeBron hian 3-2 dinhmun hi tun hmain vawi riat a lo tawng tawh a; 2012 conference semifinal-ah Celtics, 2013 NBA finals-ah San Antonio Spurs leh 2016 NBA finals-ah Golden an hmachhawn ṭumin hnehna a chang leh bawk a. Ṭum riatah vawi li chakin series a lak zui erawh vawi thum a ni.

Eastern Conference bik chauh thlir chuan LeBron hian vawi li tla thei dinhmunah hian a ding tawh a, heng match lia a average chu 38.3 points a ni. Kum 2012-a Celtics nen an inhmachhawn ṭum chu a hmuh hniam ber ṭum niin point 31 a la hmu pha tho a. Inrinni zinga Cavs-in Celtics an mikhual hunah LeBron en bik a sual lo ang.