Emery-a'n champion a tum ngam

Arsenal manger thar Unai Emery chuan London a pan hnua a vawi khat nan Nilaini khan press conference a nei a, Gunners chu Premier League mai ni lo khawvel club ṭha leh hlauhawm zinga an tel chhoh leh tur thu a sawi.

Tun hnaiah kum zawnin Arsenal hian Champions League an khel phak dawn lo, league lamah a sang pali zinga an tel phak loh bakah Europa League nomawi an chawi phak loh vang a ni. An boruak tawn mek en chuan Emery hian club ṭha sa tak a enkawl dawn lo a, hmasawn tur chuan siamrem ngai lai tam tak a awm tih a hriat theih.

Kum 46 mi Emery chuan, "A pawimawh chu thawhhona ṭha a ni a, player ten theihna sang tak an neih hi a nihna anga an hman chhuah theih nan kan thawkrim dawn a ni. Nomawi chawi thei zinga tel phak chu kan thil tum langsar tak tur a ni ang, ka tan chuan chona thar lian tak a ni dawn a, chona hmachhawn tur neih hi ka duhthusam a ni," tiin a sawi.

Sevilla manager hlui chuan sawi zawmin, "Champions League leh Premier League nomawi kan chawi nghal ang tih chu ka thiam thei lo che a, mahse hlawhtlin tumin kan thawkrim dawn tih chu ka tiam che u, a chhanna chu kan hmu ngei ang," a ti. Emery hian EPL chu khawvel league lian leh harsa a nih thu a sawi a, manager ropui tak tak zingah Pep Guardioa leh Jose Mourinho te nena inel chu a hautak tur thu a sawi tel bawk a ni.

Spanish manager hian sap ṭawng (English) a thiam nal tawk lo a, thuthar thehdarhtute an kawm ṭum hian Arsenal chief executive Ivan Gazidis chuan bul a ṭan. Gazidis hian Arsene Wenger thlak tur an zawn kawngah April 25-May15 chhung khan mi pariat an biak thu a sawi a, mi pariat zinga Emery an thlan chhan chu hmathlir a neih ṭhat tawk vang niin a sawi bawk.