Kolkata tan final a hnai

Indian Premier League final-a inhmachhawn tur hriat nan match khat chauh a ngai tawh - Kolkata Knight Riders chuan Nilaini zan khan eliminator-ah run 25-in Rajasthan Royals an hneh a, final lut turin match khat chak chiah an mamawh tawh.

KKR hian hnehna an chan avangin qualifier 2 an lut a, zanin dar 7:00-ah qualifier 1-a Chennai Super Kings hneh lotu Sunrisers Hyderabad nen final luh an inchuh ang - final hi May 27 zanah khelh tur a ni thung.

Eliminator inkhelah KKR an bat hmasa zawk a, wicket li an hloh meuh chuan run 51 bak an la tlin lo. Mahse, Kolkata club mualpho lutuk tur hi Dinesh Karthik (52 runs) leh Andre Russell (49, not out) te chuan an rawn chhanhim a, over 20-ah run 169 siama wicket sarih hlohin target pangngai tak an tuk.

Rajasthan Royals tan opener leh captain Ajinkya Rahane-a'n run 46 siamin bul rawn ṭan ṭha viau mah se Sanju Samson (50 runs) tih loh batsman dang zingah run 20 chuang vaw thei pawh an awm lo - over 20-ah run 144 lek siama wicket li hlohin an tlawm ta a ni.

Inkhel Result
KKR 169/7 (20) bt Rajasthan Royals 144/4 (20)
* Run 25-in Kolkata Knight Riders an chak
Zanin Inkhel Tur - Qualifier 2
Sunrisers Hyderabad 7:00 PM Kolkata Knight Riders