Mikel Arteta dinhmun a ṭha

Arsenal manager Mikel Arteta chu coronavirus kai mah se a dinhmun a ṭha tawh a, tunah hian a naute ho khawm turin a inpeih leh tawh. Gunners hian March 24, Thawhlehni aṭangin team training neih ṭan leh tawh an tum.

Arteta-a'n hri leng a kai tih an hriat hnuah Arsenal squad chu mahni awm hmun ṭheuhah ni 14 chhung khung hran an ni a, player bakah club tana hna thawk leh a kaihhnawih theih mi 100 chuang zet an khung hrang a, tunah chuan an dinhmun a ṭha. Khung hran hun a tawp rual hian training nghal an tum.

Gunners chuan an manager Arteta chuangchangah thu-chhuah siamin, "Mikel hi a dinhmun a ṭha zel, a rilru leh taksa pawh a inpeih tawh hle. Player nen an inbia a, ruahmanna hrang hrang pawh ṭha takin a nei 

thei reng. "Tualchhung mite thlawpna kan dawng ṭha a, hun harsa kan tawh lai kan paltlang theih nan hian ngaihtuahna pawh kan seng zel ang, boruak ṭha lam dawn zel kan beisei," tiin an sawi.Football Association (FA) chuan Premier League chu a chawlh lailawktir mek a, a rei lo berah pawh April 30 chhung chu an khel rih lo ang. Gunners hian training zawm pawh ni se inelna tak an la hmachhawn mai thei dawn lo. EPL khelh hun an sawn takah chuan club lam tan pawh training hun pawh sawn hlat leh theih a la ni dawn. Inkhel a awm loh avangin club tana hna thawktu ṭhenkhat chuan an pawisa hmuh tur an hloh thei dawn.