Champions League final ; A hun a thleng dawn ta

Zanin dar 12:15-ah football khawvelin Kiev khawpui a hawi dawn a, Real Madrid leh Liverpool ten European champion nih inchuhin Champions League final an khel dawn.

Real Madrid thiampuipa Cristiano Ronaldo-a'n, "Team ṭha zawk kan ni," tiin a sawi a, a khelhpui vek Toni Kroos-a'n, "Rinkai zawk nih hi engtihna mah a ni lo," a ti thung.

Zinedine Zidane-a nauten season hnih chhung a zawnin Champions League nomawi an chawi tawh a, Liverpool squad-ah erawh Champions League final khel an la awm lo!

Jurgen Klopp-a chunga zamna thlen tur erawhin hei hi a tling tawk lo, German coach hian, "Real Madrid tawnhriat ngahna hi tumna, rilru huaisenna leh thawhrimna hmangin kan hneh thei tih ka hria," tiin a lo sawi tawh.

Attack vs Attack
Zanin inkhel turin final a nihna piah lamah ngaihven hlawh zualna chhan pakhat a nei a, chu chu goal a ni–team pahnih hi Europe-a goal khung thiam ber pawl an ni a, an innawr tawn tur hi khawvelin a hmu chak.

Real Madrid-in tun season Champions League-ah ringawt goal 30 an khung tawh a, tam tak a ni–mahse anni aiin Liverpool-in an la khung hnem zawk a, English club hian goal 40 ngawt an khung tawh!

Real Madrid goal khung 30 zinga 15 chu Ronaldo khung a ni a, assist vawi hnih a nei bawk. Liverpool tan Mohamed Salah, Roberto Firmino leh Sadio Mane te an ropui a, anni pathum hi ngaihthah thiang lo tur an ni.

Firmino hian goal 10 a khung bakah assist vawi riat a nei a, Salah-a'n goal 10 tho khungin assist vawi li a nei a, Mane-a'n goal kua a khung bakah assist vawi hnih a nei.

Attack vs defence
Real Madrid tlarhnung kan en chuan Dani Carvajal, Raphael Varane, Sergio Ramos leh Marcelo te ho an awm a, Liverpool tlarhma meuh tan pawh paltlang harsa tak tur an ni dawn.

Real left back Marcelo-a'n goal nawr tura tlanchhuah nuam a tih ṭhin avangin Ramos-a'n Salah veng turin hna a ngah sawt dawn tihna a ni a, Spanish defender hian zam phah nan erawh a hmang lo.

"Player 11 zinga pakhat ve mai a ni," tiin Salah chungchang a sawi a, mahse tun season bik en chuan Salah hi player pakhat ve mai a ni lo tih a lang–ṭum dang aiin Ramos a pawimawh lehzual ang.

Liverpool tlarhnung pawpin sawi a hlawh ṭhin a, mahse pound maktaduai 75-a lakluh Virgil van Dijk awm hnuah an tlarhnung a phui sawt–Ronaldo meuh dah 'nil' tur erawh chuan Dutch defender hian 100% chuangliam pek a ṭul dawn tih a hai bik lo ang.

Ronaldo ngaihdan
Zidane-a'n final khel turin Ronaldo chu 120% fit tiin a sawi a, Portuguese forward a phur tawh hle. Ronaldo chuan, "Beiseina sang tak ka nei a, ka rilruah hlauhthawnna a awm lo. Mahse, Liverpool hian phu tak chungin final an lut a, kan zah tur a ni.

"Tlarhmaah player tlan chak tak tak an nei a, Real khelh dan nen pawh a in ang hle. Ka ngaihdanah chuan team ṭha zawk kan ni a, mahse chumi vanga inthlahdah tur erawh kan ni lo," a ti.

Real midfielder Toni Kroos chuan, "Liverpool player 11 zet chu ramsa ang maiin an tlan kual ang a, minute 90 chhung phur takin an khel ang. 100% pein an inkhel ang a, chu aia tam zawk pawh an pe hial ang.

"He team hi an forward vanga fak hlawh an ni a, mahse an squad pumpui an ṭha tih kan hai tur a ni lo," tiin a ṭawng fimkhur hle.

Ronaldo vs Salah
Real Madrid innghahna chu Cristiano Ronaldo a la ni reng a, tun season-ah inelna hrang hrangah match 43 khelin goal 44 a khung tawh. Portuguese forward hian Champions League-ah ringawt goal 15 a khung tawh a, 2017-18 season-a ama record lo siam tawh goal 17 tlin turin goal hnih chiah a mamawh tawh.

Ronaldo hian 2008, 2014 leh 2017 Champions League final-ah te goal a lo khung tawh a, boruak a san poh leh a chet ṭhat a zual ṭhin–Kiev khawpuiah a inthlahrung thut lo tawp ang. Tun season-ah zet chuan Mohamed Salah hming tel loin Premier League leh Champions League chungchang a sawi theih loh a ni ber. Premier League-ah goal 32 khungin record a siam a, inelna hrang hrangah match 51 khelin goal 44 a khung tawh bawk.
Egyptian forward hian English football-a mimal chawimawina ngaihhlut zawng zawng chu tun season-ah a hui vek a, khawvel huapa a hmabak chu Ballon d'Or a ni.

Salah hian Champions League-ah Liverpool a champion pui a nih phawt chuan Ballon d'Or a mitthla thiang ang a, Real an champion a nih erawh chuan Ronaldo hming a ri ring khawp ang.

Zidane vs Jurgen Klopp
January kha chuan Leganes-in Copa del Rey-a Real Madrid an hneh avangin Zinedine Zidane-a dinhmun a him lo niin sawi a ni a, season tawp a hnaih meuh erawh chuan history her danglam turin minute 90 chiah a mamawh ta.

Zidane hian Real a champion pui a nih chuan season thum chhung Champions League-a a zawna champion thei hmasa ber a ni ang a, he nomawi vawi thum lo chawi tawh Bob Paisley (Liverpool) leh Carlo Ancelotti (Real 1; AC Milan 2) te kiangah a hming ziahlanin a awm bawk ang.

French manager leh a elpui tur Jurgen Klopp dinhmun hi a in ang lo hle–Klopp hi a tlawm leh a nih chuan Champions League final-a vawi hnih tlawm tawh Max Allegri (2015, 2017), Diego Simeone (2014, 2016) leh Hector Cuper (2000, 2001) te kiangah a hming ziahlanin a awm thung ang!

Klopp hian major tournament final a ngam lo hle–vawi ruk a khel tawh a, vawi khat chiah hnehna a chang ve. Champions League final hi 2013 khan a khel tawh a, Bayern Munich lakah Borussia Dortmund a tlawmpui.
German coach naute erawhin tawnhriat an la nei tam lo–Champions League final khel tawh tumah an la awm lo a, Real player zinga pariat erawh an a vawi li nana Champions League nomawi chawi thei dinhmuna ding an ni thung.