Nadal kawng a awlsam dawn

Pathianni tlai aṭangin French Open khelh ṭan a ni dawn a, champion lai Rafael Nadal chuan a match hmasa berah Alexandr Dolgopolov a hmachhawn ang. Spain tlangval hian a vawi 11 nan nomawi chawi a tum dawn–final hma chuan Novak Djokovic leh Alexander Zverev te nen an inhmachawn thei dawn lo.

Mipa lamah Nadal hi rinkai ber a ni a, hmeichhe singles lamah erawh rinkai bik an awm rih lo. World number 1 Simona Halep ai mahin Serena Williams leh Maria Sharapova te rawn kir tur chu mipui ngaihven a ni a, champion lai Jelena Ostapenko chu seeded pangana a ni pha chauh.

Number 1
Kum 31 mi Nadal-a'n French Open bikah match 79 hnehna an chang tawh a, vawi hnih chiah chak loh a nei. Tun ṭuma a khingpui hmasa ber tur hi world number 54 Alexander Dolgopolov a ni, tun hma an intawn tawhnaah Nadal hian vawi sarih hnehna changin ṭum hnih a chak lo thung.

World number 1 Nadal hian kuminah clay court season a hmang ṭha chho leh tawh hle, Rome-ah a vawi riat nan a champion a, Barcelona leh Monte Carlo-ah a vawi 11 nan a champion bawk. Seeded pakhatna Nadal chuan, "Ka tan chuan Paris-ah hian thil hriatreng tur tam tak a awm tawh a, he hmuna ka kir leh thei hi a hlu hle," a ti.

Nadal hian hnehna a chang chho zel a nih chuan a naupan lai aṭanga a ṭhianpa Richard Gasquet nen third round-ah an inkhel thei dawn, nikum US Open final-a a hneh tak Kevin Anderson leh seeded pathumna Marin Cilic te chu final kalkawnga player hautak a hmachhawn theih tur an ni ang.

Zverev kalkawng
Season hmasa French Open-ah khan Alexander Zverev-a'n hneh nei loin a puanthuah a tel a, kuminah erawh rinkai ni chungin a inlan dawn. German rawlthar hi world number 3 ni mah se Roger Federer a inlan loh avangin seeded pahnihna a ni.

Kum 21 mi Zverev hian kuminah Munich leh Madrid Open nomawi a chawi tawh, inelna hnuhnung ber Roma-ah pawh final-ah Nadal lakah a vanduai mai a ni; clay court-ah a kaltluang hle–ani hian a bul ṭan nan Ricardas Berankis a tum dawn.

Grand Slam la champion lo Zverev kalkawngah hian major title 12 zet la tawh Djokovic a awm dawn a, rinkai ni phak dang pahnih David Goffin leh Nick Kyrgios te an la awm bawk avangin final lut tur chuan hna hautak thawh hmasak tur a tam dawn hle.

Serena vs Sharapova
Grand Slam vawi 23 champion tawh Serena Williams-i'n fa a neih hnuah match li chiah a la khel a, world number 453 ni mekin Kristyna Pliskova nen an inkhel dawn. Serena hi a chak chho zel a nih chuan vawi hnih champion tawh Sharapova nen fourth round-ah an intawng thei ang.

Russian nula Sharpova hi thla 15 chhung hrem tuar tawh a ni a, season hmasa khan wildcard pek a nih loh avangin French Open hi a khel lo. Grand Slam vawi nga champion tawh ni mah se nomawi parukna chawi chu a harsa dawn, a kalkawnga awm Serena hi 2004 hnuah a la hneh ngai lo.