Neymar dinhmun a ṭha - Medical staff

World Cup a hnai tawh a, hliam vanga player inlan thei lo tur hriat tur an awm nual laiin Neymar erawh a hliam a dam tawh. Brazil medical staff lam chuan an captain hliam hi an beisei aia a dam chak thu an sawi chhuak.

Paris Saint-Germain forward Neymar hi February thla khan a hliam a, March 3 khan an ramah zai niin tunah chuan a dam chho mek. Thawhlehni aṭang khan team training a zawm leh tawh a, June 14 aṭanga khelh tur FIFA World Cup-ah chuan inpeih hman tura ngaih a ni.

Brazil fitness coach Fabio Mahseredjian chuan, "Engtikah nge a ṭhat dan berin a rawn khelh chhuah leh theih ang tih chu kan sawi lawk thei lo, tuna kan sawi theih chin chu kan beisei aiin a dam chak tih hi a ni.

"World Cup ṭan hmain thla khat deuh thaw a la awm a, knock out stage chin chhiar phei chuan thla khat chuang a la awm," a ti. Mahseredjian hian an ram chu last 16 lut ngei turin a ring a, hun pawimawh an tawn hunah Neymar hoa an khelh theih ngei a beisei tihna a ni.

Kum 26 mi Neymar hian nikum nipui bazar hunlai khan Barcelona aṭangin pound maktaduai 200 zetin PSG a zawm a, Paris club tan hian league match 20 a khelh aṭangin goal 19 a khung a, inelna hrang hrangah match 30 aṭanga a goal khung zat chu 28 a ni bawk. France-ah season khat chauh la awm mah se Ligue 1 Player of the Year atan an thlang nghal.

Mahseredjian chuan sawizawmin, "Training-na hmunah player 11 leh 11 an inkhelhna hmunah a inlan ve thei tawh a, hlim taka a tlan vel hmuh chu a nuam takzet. Dimdawi takin kan enkawl mek a, ram mipuite beiseina tih hlawhtlin ngei tumin hma kan la mek a ni," a ti.

Neymar bakah Douglas Costa chuan malpui hliam tenau a tuar mek a, Bayern Munich midfielder hliam erawh a nasat loh avangin Russia pan turin buaina a nei lo ang. Brazil tana koh zinga mi Marcelo, Casemiro leh Roberto Firmino te chuan Champions League final an khelh dawn avangin an ram squad hi an la zawm lo.

Tun dinhmunah Brazil hian Teresopolis, Rio de Janeiro-ah training an nei mek a, June 6 aṭangin London-ah an insawn ang–he ta ṭang hian Real Madrid leh Liverpool player pathumte hian an ṭhiante an zawm ve leh dawn a ni.

World champion vawi nga ni tawh Brazil hi World Cup 2018 khel tura inpet tling hmasa ber an ni a, Tite-a naute hi Group E-ah Costa Rica, Serbia leh Switzerland te nen an awmkhawm a, an match hmasa ber atan June 17 hian Switzerland nen an inkhel ang.