Game 5-ah Rockets-in Golden State an hneh

NBA Finals Western Confe­rence finals nimin zinga inkhelah Houston Rockets-in Toyota Centre-ah Golden State Warriors chu 98-94 in an hneh a, 3-2 in hma an hruai chiah. Pathianni zing dar 6:30 hian game 6 khelh turin Rockets-in Oracle Arena an tlawh ang.

Eastern Conference finals game 6 chu tukin zing dar 6:00 hian Cleveland Cavaliers leh Boston Celtics ten Quicken Loans Arena-ah an khel a, Boston hian 3-2 in hma an hruai mek. LeBron James-a telna Cavs hian hnehna an chang thei a nih chuan Thawhṭan zing dar 6:00-ah game 7 khelh tur a ni.

Intum tawk
Houton Rockets-in an home-ah bul an ṭan a, first quarter-ah 23-17 a ni a. Second quarter-ah champion lai Golden State rawn che ṭhain 28-22 in an hneh let a, halftime-ah 45-45 a ni.

Third quarter-ah an inlehthal tawn zak zak a, 27-26 in GSW an chungnung hret. Quarter tawp berah hmuhnawm a awm tih a chiang a, court neitu Rockets dingchangin 98-94 in an hneh.

Quarter tawpna
Quarter tawpna berah Roc­kets an che ṭha a, point rukin an fal hman a. GSW lamin awlsam taka tlawm an tum lo a, Dramond Green leh Klay Thompson te thiamna leh finna a lang chho a. Kevin Durant-a'n Chris Paul chiang taka a block te chu Golden State tan phurna a ni.

Amaherawhchu, Quinn Cook-a'n 95-94 a an hnufual laiin tibuaitu a awm lo chungin a hlah. GSW coach Steve Kerr-a'n regular season-a 3-points lut thei tak Cook chu fourth quarter-ah a luhtir a, vawi thum 3-points attempt nei mah se a hlah vek avangin Kerr-a'n substitution a siam fuh tawk lo.

Second 22 a la awmin Stephen Curry-a'n ball a keng a, an hnufualna chu point khat chauh a la ni nachungin point a hlawh chhuak lo a, foul a draw bawk si loh avangin Houston-in dinhmun siam ṭhat nan an hmang a, point khat neih belh lehin 96-94 chiah a ni.

Second 6.7 a la awmin Dray­mond Green-a'n Curry hnena a ball hmuh chu a thlauh a, ball changtu Houston thahrui pawimawh Eric Gordon chuan freethrow hlawh chhuakin a lut ve ve. Quarter tawp berah GSW innghahna Kevin Durant pawh che ṭha bik lo a, vawi li attempt a hlah vek a, point hnih a neih erawh freethrow aṭanga a luh ve ve a ni.

Lawm a kim lo
Houston-in hnehna an chan ṭum hian James Harden-a'n ṭum dang a pha lo a, 3-point attempt vawi 10 a neih chu a lut lo vek a. Chutichung chuan Harden hian point 19 a nei pha tho a, point ngah ber Eric Gordon (24 pts) a langsar ber.

Houston tan hnehna chan a lawmawm a, amaherawhchu point 20 neitu Chris Paul chu inhliam vangin a khel tluan lo a, game 6 khel turin a dinhmun a chiang lo.

A la tawp lo
Houston guard James Har­den chuan, "Engmah a danglam phah lo. Kan match khelh tur zel atan theihtawp kan chhuah ṭhin," tiin khelh hmabak a la awm thu a sawi.

Warriors coach Steve Kerr chuan, "Kan awmnaah hian hlauh­thawnna ka nei lo a, mak pawh inti maithei a, ka thil hmuhah ka chiang a ni," tiin a inringtawk hle.

NBA finals hnuhnung pathumah Cavs leh Warriors te an inhmnachhawn a, tunah chuan team pahnih hi an conference finals-ah 3-2 in an hnufual ve ve mek a, a ṭum li nana an intum leh dawn a nih chuan an thochhuah ve ve a pawimawh ang.