Premier League khel tur Fulham

Fulham chuan Aston Villa hnehin Premier League ticket an nei ta a, season tharah English club-te inelna sang berah an hmel an lan thei dawn. Inrinni zan Wembley Stadium-a playoff inkhelah Fulham hian Tom Cairney goal khat hmangin 1-0 in hnehna an chang.

Goal awmchhun hi captain Cairney khung niin, winger Ryan Sessegnon hnen aṭanga a ball hmuh chu minute 23-naah Villa goalkeeper Sam Johnstone dan theih lohin a khung. Hun tawp hma minute 20 a la awm tihin Fulham defender Denis Odoi chu hnawhchhuah ni mah se inkhel result a danglam phah tawh lo.

Fulham hma hian Championship pakhatna Wolverhampton Wanderers leh league table-a pahnihna Cardiff City te chu Premier League khel turin an tling tawh bawk a, anni hian season hmasa lama EPL club Swansea City, Stoke City leh West Brom te hmun ruak an luah sak dawn a ni.

Kum li hnuah
1879-a din tawh Fulham hian tun hmain Premier League an khel tawh ṭhin a, season li zet an khelh phak loh hnuah an kir leh dawn. Championship season hman zawh takah pathumna an ni a, playoff an khelh a ngai.

Aston Villa laka goal khungtu Cairney leh a siamsaktu Sessegnon te chu player langsar leh hmuhnawm an ni a, Championship Player of the Season award dawng thei tur an chhawpchhuah pathum zinga pahnih hian Chelsea captain hlui John Terry telna Villa tlarhnung an chhaih buai thei hle.

Award dawngtu Sessegnon-a'n a ball thiam leh chet ran zia a lantir leh a, kum 18 mi hian mual lai aṭanga ball a lak chu chakna goal khungtu Cairney tan a siamsak bakah; second half-ah goal hnihna khung theihna hun ṭha nei mah se a ban a tauh per hlauh.

Hmasawn Fulham
Fulhma hian beisei angin season bul an ṭan fuh tawk lo a, a hniam lamah hun hmasa lam chu an hmang deuh reng. Nikum December thla khan Sunderland an hneh a, table-ah 12-na niin league hmahruaitu pahnih an phak lohna chu point 18 zet a ni.

Mahse, beisei phak baka ṭhain season chawhnu lam an hmang thung. Slavisa Jokanovic-a naute hian an match hnuhnung berah khan Birmingham hneh se la chuan pahnihna ni thei dinhmunah an ding phak hial. Season hmasa ang bawkin playoff an khel leh a, parukna Derby an hneh hnuah an hnuai chiah awm Villa an ngam leh bawk.

Grealish chelh a ngai
Season liam ta Aston Villa player pawimawh leh hmuhnawm chu Jack Grealish a ni. Kum 22 mi midfielder hian season tir lamah a kal (kidney) na vangin thla thum inkhel thei lo mah se a rawn kir hnuah player ṭangkai a ni. Fulham lakah pawh tlarhnung chhaihbuaitu leh inkhel khaikhawmtu pawimawh a ni phak.

EPL an khelh dawn loh avangin English midfielder hian amah ngaihventu club lian dang a zawm mai ringtu an tam hle. Villa manager Steve Bruce chuan, "Jack hian hmun dang min pan san lo se kan duh. Mimal tak pawhin kan hnenah season khat tal hman chhunzawm leh se a ṭhat zia lanchhuah tirna hun a nei ang," tiin a sawi.