NBA Conference finals-ah game 7!

LeBron James-a'n Inrinni zingah King James tih a phu zia a lang nawn a, Cleveland Cavaliers-in Eastern Conference finals game 6-ah Boston Celtics-in 109-99 in an hneh a, game 7 a awm dawn. Western Conference finals-ah Golden State Warriors-in 115-86 a Houston Rockets hneh ve bawkin game 7 khelh a ngai ve bawk.

Kum 1979 hnua a vawi khat nan Eastern leh Western Conference finals-ah game 7 a awm ve ve a. Tukin zing dar 6:00 hian TD Garden-ah Celtics-in Cavs an mikhual ang. Naktuk zing dar 6:30 hian Rockets-in champion lai Warriors an mikhual ve bawk ang.

King James
Tukin zing hian TD Garden-ah eng pawh thleng se LeBron James erawh a ropui hle. King James hian point 46 bakah rebounds vawi 11 leh assists vawi 9 a nei a, hei bakah hian statistics-a lang lo hun tawp dawna 3 points ropui tak pahnih te a tel a, Cavs chakpuitu a ni.

James hian Cavs hi final a thlenpui thei a nih chuan a zawna NBA Finals vawi riat a khelhna tur a ni dawn. Cavs star hi NBA history playoff china point average nei ṭha ber a ni a, game khatah 34.1 a nei pha a. Inrinni zing hi James-a'n playoff-a point 40 aia tam vawi sarih a luhna a ni.

LeBron ropui lehna chu hun pawimawha a che ṭha ṭhin hi a ni a, tlak theihna inkhel 'elimination game' ah ṭum sarih zet point 40 a khung tling. Amaherawhchu LeBron-a'n game 7-ah fiahna harsa a paltlang a ṭul a, Boston Celtics-in tun season playoff-ah TD Garden-ah hnehna an la chang vek a, Cavs pawh hi ṭum thum an hneh tawh a ni.

Thompson a rintlak
Oracle Arena-ah court neitu Golden State Warriors-in bul an ṭan fuh lo. Houston Rockets-in nimin zing inkhela quarter hmasa berah 39-22 in an hneh a, an inthlauhna hi point 17 lawih a ni.

Amaherawhchu quarter hnihna aṭangin GSW an insiamṭha a, hun tawp meuh chuan 115-86 in an sawp. Golden State guard Klay Thompson chuan point 35 a nei a, Stephen Curry chuan point 29 a nei a, Kevin Durant-a'n point 23 a nei ve bawk.

Thompson hian point 35 nei turin vawi 23 aṭangin 13 a lut a, hetah hian 3 points vawi 14 aṭangin vawi 9 a lut. GSW guard Thompson-a'n kum 2016 khan Thunder nen Game 6 an khelh ṭum pawhin point 41 a nei a, hetah hian vawi 31 aṭangin 14 a lut a, hetah hian vawi 18 lai 3-points luh tumin vawi 11 chu a lut.

GSW guard Thompson chuan, "Tun ang reng hi ka ni bik lo. Nuggets kan hneh loh ṭum phei chuan ka lungawi loin jersey nen arena a ka chhuahsan hial. Tunah erawh chutiang chu ka ni tawh lo a, ka theihna zawng zawng ka chhuah chuan kan result neih ang lawm takin ka pawm ṭhin. Game 6 pressure sang hmachhawn tura piang ka nih leh nih loh ka hre lo a, hemi thleng tur hian ka thawkrim tih erawh ka hria," tiin a sawi.