Uber Cup champion Japan

Inrinni khan Japan nula te chuan inelna thlengtu Thailand 3-0 a hnehin Uber Cup champion an ni a, kum 37 zet hnuah nomawi an chawi. Uber Cup hi hmeichhe tana ram leh ram badminton team hmanga inelna a ni.

Japan hi Group A-ah awmin match thum an khelh hnuah a sang ber an ni a, an group aṭangin hian Canada nen quarterfinal an lut - pathumna India chuan knock out round an lut phak ve lo. Quarterfinal-ah Chinese Taipei an hneh hnuin South Korea an paltlang leh a, champion lai China hneh theitu Thailand lakah pawh harsatna tawk loin pakhatna an ni.

Kum 1981 khan Japan hian Uber Cup hi an chawi tawh a, hlawhtlinna chang zui loin an awm rei hle. Kuminah hian world singles number 2 Akane Yamaguchi chuan Ratchanok Intanon chu 21-15, 21-19 in a hneh. Doubles pair Yuki Fukushima leh Sayaka Hirota te harsa lo taka hnehna an chan hnuah Nozomi Okuhara chuan Nitchaon Jindapol lakah 21-12, 21-9 a hnehna changin an chak a nemnghet.