Powerlifting competition-ah Iron House Powerlifting Club champion

10th Mizoram Powerlifting Competition chu Inrinni khan Mizoram Powerlifting Hall, Republic Vengthlang, Aizawlah tluang taka neih zawh a ni a, Iron House Powerlifting Club chu pakhatna an ni.

Inelna hi May 24 aṭanga neih ṭan a ni a, lifter 67 zet an inlan a. Mipa tan junior leh senior category siam a ni a, hmeichhe tan weight category pathum siam a ni a. Aizawl District bakah Kolasib leh Lunglei aṭangin power lifter an fuan khawm.

Championship-ah hian Power Macho Powerlifting Club lifter Lalsangliana chuan squat-ah 300 kgs leh bench press-ah 201kgs chawiin he mi category pahnihah hian Mizoram record thar a siam. Deadlift ah erawh nikuma Mizoram record 280kgs Lalhriatrenga, Power Macho Powerlifting Club in a lo siam tawh chu khum zo an awm ta lo a ni.

Best Lifter-ah record pahnih siamtu Upper Republic tlangval Sangliana chu thlan a ni a; Lalthangmawia, Bungkawn Slick Powerlifting Club chu 'strongman'-ah thlan a ni bawk. Powerlifting inelna hi tun hnaiah khawvel huap aṭanga tualchhung inelna thlengin a ṭhang duang hle.