MBBA Cup champion Khatla TBL

Mizoram Basketball Association (MBBA) in season ṭanna atana an hman MBBA Cup chu Inrinni zan khan Hawla Indoor Stadium-ah khelh zawh a ni a, Khatla TBL-in 76-64 a Tuikual South hnehin an champion.

Mizoram Super League season hmasa pahnih champion hnuah Khatla TBL-in Mizoram inelna sang berah season hnih chhung nomawi an chawi tawh lo a, kuminah intuai thar lehin MBBA Cup aṭangin an la thu tak nghal a, harsatna nei loin an champion nghal.

Khatla TBL hian match hmasa berah MSL kai thar Zarkawt Serpents chu 75-49 in an sawp a, MSL aṭanga tla hlim Republic VR4 chu 93-58 a sawp lehin group hmahruaitu ni turin Tuikual South 107- 64 in an sawp leh bawk.

Semifinal-ah TBL hian Misssion Veng Vikings chu 88-66 in a hneh a, inkhel pakhat zawkah group stage-a an awmpui Tuikual South chuan mak takin MSL champion lai Zarkawt BCA 84-78 a an hneh avangin champion kalkawng a awlsam sawt. India aiawh pawha khel tawh H. Laldinsanga (Mapuia) kaihhruai team-te hian final-ah Tuikual South hi 76-64 in an hneh a, quarter tawp ber tih loah chuan chan ṭha zawkah an chang vek.