IPL champion Chennai Super Kings Sunrisers tan ni a êng thei lo

29th May, 2018

Khawvel cricket league-a sum tamna ber Indian Premier League final chu Pathianni zan khan khelh a ni a, Chennai Super Kings an champion.

Chennai club hian qualifier 1-a an hneh tawh Sunrisers Hyderabad chu wicket riatin an hneh a, malpui hliam nei chunga century siamtu Shane Watson chu CSK chakna a ni.

India ramah league ngaihven hlawh zual pahnih a awm a, Indian Super League leh Indian Premier League a ni–he inelnaah hian Chennai club ve ve an champion.

Bul ṭan fuh lo
Sunrisers Hyderabad-in league round-ah CSK hi vawi hnih an hmachhawn tawh a, an tlawm ve ve. Qualifier 1-ah team pahnih an intawng leh a, CSK bawk a chak zawkah an ṭang.

SRH-in Qualifier 2-ah Kolkata Knight Riders hnehin final an lut ta tho a, record hlui thlirin final-ah chak beiseina erawh a sang lo.

Hyderabad club an bat hmasa a, opener Shreevats Goswami-a'n run nga chiah a siam tihin a 'run out' nghal! Hma takaah Shikhar Dhawan (26 run) a out ve lehnghal bawk a, SRH-in over 8.3-ah run 64 chiah an siam tihin wicket hnih an hloh fel der tawh!

Beiseina chu
SRH tan captain Kane Williamson rawn luh hnuah beiseina a sang ve leh sawt a, New Zealand batsman hian run 47 ngawt rawn siamin a team tan beiseina thar a siam.

Yusuf Pathan-a'n final a talbuai tur player a ni lo tih a pholang ve bawk a, Indian batsman hian ball 25 lek a hmachhawnah run 45 a rawn siam a, a tawp thleng a dam bawk.

SRH-in over 20-ah run 178 siamin wicket ruk chiah an hloh a, target pangngai tak an siam. CSK laka chak tura an beiseina chu bowler te ko-ah a innghat chhunzawm.

Hei le Watson
CSK bat hun a thleng a, Watson leh Faf du Plessis te an rawn pen chhuak. Malpui hliam nei chungin Watson a inlan a, a ball hmachhawn hmasak 10-ah run a siam miah lo – commentator ten player in fit lo a inlan mak an ti a, CSK dinhmun a him lo niin a lang.

Mahse, batsman huaisen leh tawnhriat ngah Watson a talbuai phah lo–a theihna tak tak a pholang a, ball 57 a hmachhawn aṭangin run 117 ngawt a rawn vaw chhuak a, a tawp thlengin CSK bowler zingah Watson-a'n amah vawm out theitu a hmu lo!

Australian batsman hian ball kua bak an nei tawh lo tihin CSK chu an target hi a umphak pui–vawi 11 ngawt four a vaw chhuak a, six vawi riat a vaw chhuak bawk. Kum 36 mi batsman hian IPL final-a run siam hnem thei ber record a siam nghal.

Shane 'Shocking' Watson
CSK captain MS Dhoni chuan, "Min ṭawiawmna zawng zawngah lawmthu kan sawi a, Shane 'shocking' Watson khan awihawm loh khawpa bat ṭhain hnehna min chanpui a ni," tiin final-a man of the match-a thlan chu a fak.

India captain hlui chuan CSK player-te kum a tam tawh tia an sawi ṭhin chu a chhang a, "Kan kum zatin sawi a hlawh a, mah se kum ai chuan fitness a pawimawh zawk," a ti a, fitness an neih ṭhat avangin nomawi an chawi thu a sawi.

CSK coach Stephen Fleming chuan, "Kan formula chu 'tawnhriat' a ni. Tawnhriat bakah professionalism kan en tel a, chumi pahnih keng kawp teltu chu Watson hi a ni," tiin a hlim hle.

A hming i fak ang!
Royal Challengers Bangalore leh Rajasthan Royals tan pawha lo khel tawh Shane Watson hi cricket ngainatu zingah mi thar a ni tawh lo. Kum 2000 chhoa Australia 'golden era' an tih zinga mi a ni.

Kum 2016 khan international cricket bik chu a chawlhsan tawh a, club cricket-ah erawh India bakah Australia, Pakistan leh West Indies-ah te a khel kual.

Watson chuan, "Game hautak leh boruak sang, he club tana hlu em ema century siam theih chu danglam tak a ni," a ti.

Thawhlehna ropui
IPL-ah team hmuhnawm ber pawl ni mah se Chennai Super Kings hi kum 2015 khan IPL-a thamna sum lak, pawisa inthapna leh match fixing vangin kum hnih chhung atan an hrem.

Kum hnih hremna an tawrh zawh hnuah kuminah CSK an rawn kir a, IPL nomawi an chawi lehnghal! Chennai club hian 2010 leh 2011 khan nomawi an lo chawi tawh a, Mumbai Indians hnungzuiin IPL-a vawi thum champion thei pahnihna an ni.

CSK hi vawi thum an champion tawh bakah 2008, 2012, 2013 leh 2015 te khan final an lut vek! Dhoni-a'n Rohit Sharma hnung a zui ve bawk a, IPL-a vawi thum champion thei captain pahnihna a ni tel ve bawk.

Sunrisers Hyderabad Innings
Batsman Bowler Runs Balls 4s 6s SR
Goswami run out (Sharma) 5 5 0 0 100
S Dhawan b Jadeja 26 25 2 1 104
Williamson st Dhoni b Sharma 47 36 5 2 130.56
Shakib c Raina b Bravo 23 15 2 1 153.33
Pathan not out 45 25 4 2 180
Hooda c sub b Ngidi 3 4 0 0 75
C Brathwaite c Rayudu b Thakur 21 11 0 3 190.91
Extras 1nb 6w 0b 1lb 8
Total (20.0 overs) 178–6

CSK bowling
Bowler Overs Maidens Runs Wickets Econ
Chahar 4 0 25 0 6.25
Ngidi 4 1 26 1 6.5
Thakur 3 0 31 1 10.33
Sharma 3 0 25 1 8.33
Bravo 4 0 46 1 11.5
Jadeja 2 0 24 1 12

Chennai Super Kings Innings
Batsman Bowler Runs Balls 4s 6s SR
Watson not out 117 57 11 8
du Plessis c & b S Sharma 10 11 1 0 205.26
Raina c Goswami b C Brathwaite 32 24 3 1 90.91
Rayudu not out 16 19 1 1 133.33
Extras 0nb 3w 0b 3lb 6 84.21
Total (18.3 overs) 181-2

SRH bowling
Bowler Overs Maidens Runs Wickets Econ
B Kumar 4 1 17 0 4.25
S Sharma 4 0 52 1 13
Kaul 3 0 43 0 14.33
Rashid 4 1 24 0 6
Shakib 1 0 15 0 15
C Brathwaite 2.3 0 27 1 10.8