Champion lai Ostapenko leh Venus an tlawm

French Open khelh ṭan niah hmeichhe singles champion lai Jelena Ostapenko leh Grand Slam vawi sarih champion tawh Venus Williams te chu an chak lo nghal. Johanna Konta pawhin Roland Garros-ah season li chhung chak ni hmel a hmu ta lo.

Pathianni zan Roland Garros, Paris-a inkhelah seeded pangana Ostapenko hi Kateryna Kozlova lakah 7-5, 6-3 in a chak lo. American nula Williams pawh world number 91 Wang Qiang hmaah 6-4, 7-5 in a tlawm. Konta pawh Yulia Putintseva chuan 6-4, 6-3 in a hneh bawk.

Player langsar pathum an chak loh nghal lai hian seeded palina Elina Svitolina erawhin Ajla Tomljanovic chu 7-5, 6-3 in a hneh ve thung a, world number 10 Sloane Stephens pawh second round a inhlangkai. US Open champion lai hian Arantxa Rus chu 6-2, 6-0 in a hneh.

2005 hnuah
Season hmasa khan seeded pawh chang phak lo Jelena Ostapenko-i'n Simona Halep hnehin French Open nomawi a chawi a, Latvian nula hi an ram player zinga Grand Slam champion thei hmasa ber a ni - kuminah world number 5 nichungin a inlan, mahse nikum ang ngawtin a che thei tawh lo.

Kum 20 mi Ostapenko hian tihsual a ngah a, a service hmasa a dik loh hnem bakah a service vawi sarih zet a hloh. Kozlova hian darkar khat leh minute 34 chhunga a tihsual vanga a khingpuiin point a hmuh belhkhawm chu vawi 48 zet a ni bawk.

French Open-ah hian 2005 khan champion lai Anastasia Myskina chu a match hmasa berah a chak lo nghal a, Russian nula Myskina hnuah Ostapenko hi nomawi kawl chunga inlan chak lo zui hmasa ber a ni. Ostapenko chuan, "A tir aṭangin a fuh lo chho vek ni berin ka hria, tihsual ka ngah em em kha sawifiah thiam mai theih pawh a ni lo. Ka tihsual siamṭhain nakkumah ṭha zawka inlan leh ngei ka tum ang," a ti.

Venus leh Konta an liam
Court Suzanne-Lenglen-ah Venus a inlan a, kum 37 mi hian Grand Slam tournament vawi 78 a khelhna chiah a ni - ani aia tawnhriat nei ṭha an awm bik lo ang. Mahse, darkar khat leh minute 40 an inkhelh hun chhungin China nula lakah set a la miah lo. 1997 hnua a vawi khat nan major tournament-ah a zawnin first round a paltlang ta lo.

Australian Open first round-a chak lo tawh bawk Venus chuan, "Tumahin hetianga awm hi an duh ngai lo ang, tennis-ah chuan duhthusam ni hi a awm tak tak thei lo," a ti. Season hmasa khan match hmasa berah bawk intawng tawhin Venus a chak; kuminah erawh result a inthlak ta chiah.

Inkhel dangah Johanna Konta pawh a ropui bik lo. Britain number 1 hian inelna neih ṭan hmain clay-ah kum dang aia a khelh ṭhat a beisei thu sawi mah se result ṭha a nei chuang lo, season li chhung chu first round paltlang zo loin a tla ta. Amah aia ranking hniam zawk daih world number 93 Putintseva lakah unforced errors vawi 32 a nei a, a khelh pui hian vawi 22 neiin a service vawi li a hloh bawk.