NBA Finals specialist Le8ron James

LeBron James-a'n hun bikah player danglam bik a ni tih a rawn lantir a, tun season playoff-a eng team mahin chak hmel an la hmuh lohna hmun TD Garden chu hming chherna hmun atan a hmang. Nimin zing khan Cleveland Cavaliers-in Eastern Conference finals game 7-ah Boston Celtics chu 87-79 in an hneh a, Cavs-in kum zawnin a ṭum li nan NBA Finals an lut.

Mikhualna hmunah King James a langsar ber a, ani hian tun season-a match 100 a khelhna chiah niin minute 48 chhung a inlan vek a, kum zawnin a vawi riat nan a khelhna team chu NBA Finals-ah a hruai thleng. Kum 2010 kha NBA Finals-a LeBron inlan loh hnuhnung ber a ni a, hemi ṭum hian tuna NBA player 78% te chu NBA-ah an la inlan lo.

Tukin zing dar 6:30 hian Houton Rockets leh Golden State Warriors ten Eastern Conference finals game 7 an khel a, heta chak zawk hian NBA Finals-ah Cleveland Cavaliers an hmachhawn ang.

Mission Impossible?
Boston Celtics-in tun season playoff-ah an home TD Garden-ah vawi 10 khelin vawi 10 an chak a, heng zinga match thumah hian Cleveland Cavaliers an hneh. Game 7-ah hian Cavs tana harsatna belhchhah turin Kevin Love chu hliam vangin an chhawr thei lo.

Thawhṭanni zing inkhelah Celtics-in first quarter-ah 26-18 in hma an hruai zui a, Cavaliers tan buaina tham a tling. Tyronn Lue hote tan NBA Finals thlen chu 'mission impossible' ang hiala ngaih theih a ni.

LeBron nen a dang
Cavaliers-in NBA history-a player ropui ber zinga mi LeBron James an kawl miau a, mamawh hunah tak a rawn inlar bawk. James hian minute zawng zawngah a inlan vek a, a chawlhna hun neih chhun chu 'time-out' an lak leh Celtics-in 'time-out' an lak zawng chu a ni.

LeBron hian point 35 a nei a, rebound vawi 15 neiin assists vawi 9 a nei a, triple double a nei teuh hle. Cavaliers star hian assist 10 a neih tlin loh chhan hi a thiam loh vang a ni tawh lo a, a teamma-te hlah hnem vang a ni tawh zawk. Cavs hian 3 points attempt vawi 35 aṭangin vawi 26 an lut lo a, heng zingah James-a pass ṭha tak tak chu vengtu nei lo chunga luh loh a awm nual.

Statistics-ah King James a fal ṭhin a, hei aia a ropuina chu boruak san laia ball a keng ngam te leh attempt a nei ṭhin te chu a ni a, mawhphurna la turin a ṭha tel bawk. Quarter hnuhnung pathumah Cavaliers an chungnung vek a, hun tawpah 87-79 in hnehna an chang a, pressure sangah Celtics rookie forward Jayson Tatum tan LeBron James el phak a la ni lo.

Player ṭha ber
Cavs coach Tyronn Lue chuan, "LeBron hi rin phak bak a ni a, khawvela player ṭha ber a ni a. Khelh ṭhat ṭum hi chu a ngah a, chutihrualin tun ṭuma mi hi NBA Finals 2016-a game 7 nen khan a khelh ṭhat ber ṭum a ni," tiin a fak.

Celtics coach Brad Stevens chuan, "Kan tlarhnung kan khel ṭha chungchuang viauin ka hria a, chutichung chuan 35-9-15 a nei pha a nia. Awih pawh a har zawk alawm le," tiin LeBron fak nan a ṭawngkam a ui lo.

Tun ṭum hi NBA Finals series-a an inhnehtawk ber ṭum a ni a, point luh tlem ber ṭumah pawh LeBron-a'n point a ngah. King James chuan, "A theihna zawng zawng ka sawng khawm a, theihna reng ka neih tawh hma loh chu tawp ka tum lo," tiin a sawi a, Cavs star hian game 7 inkhelah a zawnin a vawi ruk nan hnehna a chang a, pressure a ngam zia a lang chiang hle.