Merseyside Police-in Karius hlauhthawnpui

Liverpool FC innghahna khawpui huamtu Merseyside Police-te chuan Reds goalkeeper Loris Karius-a'n vauna a tawhte chu an ngaih thutak thu leh, an chhui zui zel tur thu an sawi.

Kum 24 mi German keeper hi Champions League final-ah Liverpool tan si ban nghaktu a ni a, vawi hnih ngawt tihsual a neih avangin fans tam takin Real hian hnehna an chan phahah an ngai a, social media lamah Karius hian vauna a tawk nasa hle.

Merseyside Police te chuan, "Karius leh a chhungte nunna atana hlauhthawnawm thei hawi zawnga social media-a tarlan awmte chu kan ngai thutak hle a, hetiang hawi zawng kan hmuh chuan kan chhui zel dawn a ni," an ti a, social media hmangtute chu fimkhur turin an chah nghal.

Karius hian vawi hnih tihsual a neih avang hian inkhelh zawhah mittui tla chungin fan-te hnenah ngaihdam a dil a, social media lamah, "Ka khelhpui, fans leh staff-te zawng zawng chungah tawp chin awm lo khawpa nasain ngaihdam ka dil a ni.

"Hun kha kohkir theih ni se kohkir ka duh a, mahse a theih si loh. Real Madrid kha kan hneh thei ngei a ni tih rilru a ngaihtuah phei chuan a hrehawm takzet a ni. Kiev khawpuia rawn kal fan-te hnenah ngaihdam ka dil a, inkhelh zawh thleng pawha min ṭawiawm tlat avangin ka lawm.

"Chhungkaw ropui tak kan ni tih min hmuh tir nawn leh a, hei hi thlamuan phah nan erawh hman ka tum lo. In chungah ka lawm a, a aia ṭha zawkin kan lo kir leh ang," a ti a, mutmu a la tuah meuh loh thu a sawi lang tel.

Hetihlai hian Liverpool goalkeeper Simon Mignolet chuan, "Loris hian puih a mamawh phawt chuan a tan ka awm reng a, goalkeeper zawng zawngin a dinhmun hi kan hrethiam a ni," tiin a sawi ve bawk.