Real aiin Barca an la chungnung zawk!
Real Madrid-in season thum chhunga a vawi thum nan Champions League nomawi chawi mah se Barcelona chuan Europe-a club ṭha ber dinhmun aṭangin an luahlan.
Sports data company Gracenote chuan Europe-a club ranking buaipuiin an zirchiang ṭhin a, ranking hi tun hnai season li aṭanga chhut niin season hman zawh tak chiaha an khelh dan chuan hmun thuma ṭhena hmun hnih ngawt point a pu tho.
Champions League final an luh avangin Liverpool-in nasa takin hma an sawn a, hmun riat ngawt zuankanin Europe-a club ṭha 11-naah an invawrh chho.
Mizote ngaihven Premier League club zingah Manchester City chu dinhmun sang ber luahtu niin pathumna an ni a, pakuana Tottenham Hotspur leh 10-na Manchester United dinhmun pawh a chhe lo.
Chelsea chu ranking panga ngawta tawlhhnungin 12-naah an awm a, Arsenal chu 11-na aṭangin 15-naah an tla thung.
Gracenote-in Europe club te a zirchiannaah hian top 100-a club lang phak hi ram 20 aṭangin an awm a, top 100-a club neih ngah lamah Premier League chuan La Liga leh Bundesliga a la phak lo.
Tehna
Club-in match an khelh apiangin an result a zirin point pek ṭhin a ni a, hetah hian an match pawimawh danin point a keng sang bawk.
Entirnan Liverpool-in Premier League-a match ṭhenkhata hnehna an chan ai chuan match tawp bera Champions League dinhmun tihchianna inkhela result khan point a pu hnem zawk.
League pakhat aṭangin Europe-a che ṭha club an awm chuan league-a team pumpuiin bonus point an hmuh phah. Entirnan, Liverpool-in CL final an luh avangin Premier League team dangin point an lo hmuh ṭhat phah.