Zverev-a'n second round lut

World number 3 Alexander Zverev chuan Pathianni zan khan Ricardas Berankis chu 6-1, 6-1, 6-2 a sawpin French Open second round a lut a, world number 92 laka hnehna chang tur hian darkar khat leh minute 11 bak a mamawh lo.

Kum 21 mi Zverev hi kumin French Open-ah hian seeded pahnihna a ni a, a vawi khat nan Grand Slam nomawi chawi a beisei mek. ATP hnuai inelna dangah erawh title pariat a la tawh, world number 1 Rafael Nadal tih loah chuan champion tura rinkai a ni.

David Goffin chuan a match hmasa berah fiahna a paltlang nghal thung. Seeded pariatna Goffin hian Robin Haase lakah 4-6, 4-6, 6-4, 6-1, 6-0 in hnehna a chang hram. Inkhel dangah Lucas Pouille, Grigor Dimitrov leh Kei Nishikori te pawhin harsa lutuk loin an khingpui an hneh ṭheuh bawk.

Kumin French Open khel zinga naupang ber Corentin Moutet chuan hnehna a chang. Kum 19 mi Moutet hi wildcard hmanga inlan a ni a, a upa ber kum 39 mi Ivo Karlovic nen inhmachhawnin 7-6 (9-7), 6-2, 7-6 (7-5) in a chak a ni.