Daniel Ricciardo Monaco GP-ah a chungnung
Daniel Ricciardo chuan Formula 1 driver championship inum aṭangin thai bo mai theih an nih bik lohzia a lantir ta. Red Bull driver hian Pathianni zana tlan zawh tak Monaco Grand Prix-ah hnehna a chang.
Australian tlangval hian qualifying aṭangin amah elphaktu a tawng lo, intlansiak takah pawh pole position aṭanga bul ṭanin Ferrari driver Sebastian Vettel-a'n na takin nawr reng mah se a buai phah lo. Monaco GP bikah hian a chak vawi khatna niin, tun season chhunga vawi hnih a chakna chiah a ni a, car intlansiakna sang berah hian vawi sarih hnehna a chang tling ta chiah bawk.
Red Bull team boss Christian Horner chuan, "Khawl lam chiang lo zeuh vangin second hnih chu kan paih a, khatiang chung pawha hnehsawh taka hnehna a chang thei kha ka chhuang hle, a hna tlin taka thawhtu hi chawimawi a phu a ni," tiin an driver a chhuan thu a sawi.
Vettel leh Hamilton
Tun hnai Formula 1 thununtu Mercedes leh Ferrari ten Monaco bikah Red Bull an tluk lo a, lap 78 an tlan zawh hian pakhatna Ricciardo leh a hnunga thleng Vettel inthlauhna chu 7.3 seconds a ni. Championship hmahruaitu Lewis Hamilton chu pathumna a ni thung.
Ferrari driver pakhat zawk Kimi Raikkonen chu palina niin, a hnung chiahah hian Hamilton-a teammate Valtteri Bottas a thleng bawk. Force India driver Esteban Ocon chu paruknaah a lang nawlh bawk.
Britain tlangval Hamilton chuan, "Intlansiak ka hmachhawn tawh zinga nuam lo berte zinga mi a ni. Red Bull leh Daniel ka lawmpui, tun ṭum bikah chuan anni kha a tlan chak ber an ni," tiin an elpui hnenah lawmpuina thu a sawi.
World champion vawi li ni tawh Vettel pawhin, "Kan team kha kan tlan muang bik lo, mahse Daniel khan eng lai pawhin dik takin car a khalh thei reng a, kan um phak lo tlang a ni," tiin a sawi.
Kuminah intlansiak vawi ruk an hmachhawn tawh a, Mercedes car khalhtu Hamilton chuan point 110 hmuin hmahruaitu a nih chhunzawm a, a elpui Vettel-a'n point 96 a hmu tawng thung. Intlansiak hnuhnung bera pakhatna Ricciardo chuan point 72 hmuin pathumna a ni thung.