Rooney leh DC United inhnaih

Tun hnaia Everton striker Wayne Rooney nena sawizawm hlawh tak DC United coach Ben Olsen chuan Manchester United legend hi lakluh theih ngei an inbeisei thu a sawi.

Everton chuan Roo­ney hi Major League Soccer club nena inbiak phalna an pe tawh a, a thuphung chuan Rooney leh American club hi an inrem tawh. Khawthlang media ten an tarlan dan chuan Rooney hi 2020 season tawp thleng an hnena khel turin DC hian an sawm.

Olsen chuan, "Wayne Rooney lakluh kan duh a, ani pawhin kan hnen rawn pan a duhin ka hria. Chiang taka tihfel erawh engmah a la awm lo a, he hmuna a rawn thlen hma chuan a rawn kal dawn leh dawn loh pawh ka sawi thei lo. Mahse, a lokal ngei erawh kan beisei," a ti.

DC United hi Washing­ton khawpuia innghat a ni a, Goodison Park-a kum khat cham tura contract la nei Rooney hian DC United dinhmun thlir turin Washington-ah hian a lo zin tawh.