A vawi 10 nan China champion
China chu 2018 Thomas Cup champion an ni. Pathianni zana final khelhah China hian 2014 champion Japan chu 3-1 in an hneh a, ram leh ram mipa badminton team hmanga inelnaah hian a vawi 10 nan nomawi an chawi.
Impact Arena, Thailand-a inkhelah China-in bul an ṭan fuh lo zawk. 2016 Olympic gold medalist Chen Long chu 2015 World Championship bronze medalist Kento Momota lakah straight set in a tlawm nghal.
Japan Badminton Association-in thamna thil vanga an lo hrem tawh Momota hian game hmasa ber 21-19 in a la a, tawnhriat ngah Chen-a'n theihtawpin game lak let tum mah se a dang thei lo, game hnuhnung zawkah pawh 21-18 in a la.
Badminton thiam ram China hian doubles pair Liu Cheng leh Zhang Nan te hmangin Japan an nih rual. Anni hian Takuto Inoue leh Yuki Kaneko te ṭangdun chu 21-10, 21-18 in an hneh. China lamin 2-1 a hma an hruai theih nan minute 45 chhungin Nishimoto lakah 21-12, 21-17 in hnehna a chang zui bawk.
Match linaah final an luh theih nana tha thawhtu pawimawh pahnih Li Junhui leh Liu Yuchen te chuan Keigo Sonoda leh Yuta Watanabe te ṭangdun lakah 17-21, 21-19, 22-20 a hnehna chang zuiin an ram hi ropuina an khum pui.
Thomas Cup hi vawi 30 an neihna a ni tawh a, kuminah hian ram 16 an inlan. China hi Group A-ah France, India leh Australia te nen an awmkhawm a, group hmahruaitu an ni. Quarterfinal-ah Chinese Taipei hnehin semifinal-ah Indonesia an ngam zui leh a, final thlengin harsatna liantham an tawk lo.