Smith Rowe leh Arsenal an vul

Arsenal manager Mikel Arteta chuan a player duhlai Emile Smith Rowe khelh danah a lawm thu a sawi a, inrintawkna a nei a nih ngat chuan team khaiding thei tur zinga mi a nih thu a sawi chhuak.

Gunners hian Zirtawpni zan khan Aston Villa an mikhual a, inkhel hmuhnawm chhawp chhuak chungin 3-1 in hnehna an chang. Smith Rowe-a'n goal a khung bakah assist a nei a, captain Pierre-Emerick Aubameyang leh Thomas Partey ten an khung ve bawk.

Rintlak Smith Rowe
Granit Xhaka a inhliam avangin Arteta-a'n midfield a siamrem a ngai a, tlarhnung lam pui turin Partey leh Albert Sambi Lokonga te an ding dun a, a hma lam pui turin Hale End chhuak Bukayo Saka leh Smith Rowe te an awm thung.

A tir aṭangin Gunners an hlauhawm nghal a, na takin Villa goal an nawr. Smith Rowe-a corner pet chu Partey chuan a tauh lut, goal a khung hma hian goal bar a tih per tawh bawk - chawlhlawk hmain Auba chuan penalty aṭangin an goal hnihna a khung belh.

Aubameyang-a penalty chhuih hi keeper Emiliano Martinez chuan a lo dansak a, mahse a per let chu Gabon striker hian a khung zui ta tho. Second half-ah Smith Rowe chuan anmahni lama ball kal a dang chat a, counter attack hmanga bei letin a hmawr bawktu a ni.

Hun tawp dawna Jacob Ramsey goal khungin Villa tan awmzia a nei phak lo. Chutih rualin khel ṭha tak keeper Aaron Ramsdale leh defender Ben White te tan clean sheet an neih tur a tihtawpsak kha an ui khawp ang.

Lungawina
Arsenal ṭantuten Arsene Wenger hun laia attacking game hmuhnawm an chhawp chhuah ṭhin kha an mitthla ṭhin a, manager Arteta-a'n a chhawp chhuak hleithei lo. Mahse, Spanish manager hian tlarhung remphui hmasak a thupui a, tunah chuan an nawr dawn ṭan ta niin a lang.

Gunners goal nawr kawngah an academy chhuak ngei mai Smith Rowe leh Saka te an hmuhnawm leh fans lawmna ti zualtu a ni a, a chhe thei ang bera season bul ṭan ni mah se tunah chuan an nui ve leh ta.

Arteta chuan, "Club lian takah mawhphurhna pawimawh i chelh a nih chuan i rilru zawng zawngin inkhelh i ngaihtuah a ngai, chu mai bakah match khat chauh ni loin kan hmabak ngaihtuah tel a ngai, chutiang chu tun ṭumah khan ka hmu," tiin Smith Rowe chungchang a sawi.

Arsenal manager chuan sawi zawmin, "Smith hian a nunphung ṭhenkhat a thlak a, tunah chuan thil a nih dan tur ang thlapin a ti mek," tiin a player lakah beisei a neih san thu a sawi a, a hmuna inkhel entu England manager Gareth Southgate mit pawh a tlung ngei ang.