Man City tan Phil Foden

Manchester City chuan season bul ṭan fuh tak Brighton & Hove Albion chu 4-1 in an hneh. Citizens tan hian Phil Foden-a'n goal hnih a khung bakah Ilkay Gundogan leh Riyad Mahrez ten goal khat ve ve an khung bawk.

Pep Guardiola-a'n a ze ngai chhuahin player a siksawi leh a, midfielder Kevin de Bryune chu hahchawlhna hun a pe a, match hmasa lama 'chance' a pek Raheem Sterling chu a khel lo a ni satliah lo, squad-ah a hming a lang lo.

England international Sterling hian inkhelh tam a duh a, chhuah mai pawh a hreh loh thu a sawi tawh. Pep-a'n player chhuak duh chelh a tum lo a, season tharah chuan club dang jersey a ha tawh a nih pawhin a mak lo ang.

Sterling boruak karah Foden erawh a buai lo, English rawlthar hian amah ringtu Guardiola a ti thlawn lo. Pep-a naute hian chawlhlawk hmain goal thum an khung tling der tawh a, match hmasa pariata goal nga chiah chhuah Seagulls tan Man City meuh chu dan theih an ni lo.

Man City manager Guardiola chuan, "Midfielder a ni a, mual sir ding leh vei lamah winger atan a hman theih, false nine pawh a ni thei. Khingpuite goal bulah chuan mamawhna hmun apiangah a hman theih," tiin a player Foden a dah sang hle.

Pep-a naute hian point 20 hmuin Premier League table-ah pahnihna an ni a, hmahruaitu Chelsea an thlah fal duh bik lo - Blues an phak lohna hi point hnih chauh a ni; anni pahnih hian na takin nomawi an inchhuh chhunzawm dawn niin a lang.