I League khel tur Rajasthan United
Rajasthan United chuan season tharah I League an khel dawn - Rajasthan aṭanga I League khel hmasa ber tur club hian I League qualifier-ah table chung ber luahin Indian football-a inelna ngaihhlutah an inlan ve thei dawn ta a ni.
Inrinni khan qualifier-a an match hnuhnung berah Rajasthan hian tlang turin draw result bak an mamawh lo a, Mumbai club Kenkre chu goal khung loa an inhnehtawkpui avangin I League khel tur hian an tlang.
Qualifier kalphung
I League qualifier hi October 4 aṭang khan khelh ṭan a ni a, Bangalore khawpui chuan a thleng. Team pakuain inelna an hmachhawn a, group pahnihah team pali leh panga awmin ṭhen hran an ni.
Vawi khat ṭheuh an inkhelh kual hnuah group-a a sang pahnih ve ve chuan final round an lut leh a, final round-a team palite hi vawi khat ṭheuh inkhel kual lehin a sang ber hi I League khel turin an tling.
I League chu
December aṭangin I League hi khelh ṭan tura ruahmanna siam a ni a, nakkum April-ah khelh zawh hman tum a ni. Covid-19 vangin hmun khatah inelna hi neih a ni dawn a, Kolkata khawpui chuan inelna hi a thleng ang.
Team 13-in tun season I League hi an hmachhawn dawn a, season hmasa khan club 11-in inelna hi an hmachhawn. Rajasthan United bakah Sreenidi Deccan chu tun season-a club tel thar tur an ni a, I League a ngaihnawm chho dawn.
Team 13
Aizawl FC pawhin I League an hmachhawn dawn a, anni bakah hian Chennai City, Churchill Brothers, Gokulam Kerala, Indian Arrows, Mohammedan SC, Neroca, RoundGlass Punjab, Rajasthan United, Real Kashmir, Sreenidi Deccan, Sudeva Delhi leh Trau ten inelna an hmachhawn dawn.
Season hmasa aia team tel an tamna chhan hi AIFF-in hmun ruak pakhat chu lilam hmanga a pek vang a ni a, Sreenidi chuan an chang. Hei bakah hian I League qualifier aṭanga kaisang club pakhat an awm a, season hmasaa relegate Neroca chu Covid-19 vanga hriatthiam niin an relegate leh lo bawk!
Inelna chu
Covid-19 vangin inelna kalphung pawh season hmasa ang tho hman a ni dawn. Club 13-te vawi khat ṭheuh, single leg-a an inkhelh kual hnuah top 7 leh top six-ah ṭhen hran leh tur an ni dawn.
Top 7 chin hian vawi khat ṭheuh inkhel kualin champion tur an zawng leh ang a, a hnuai lam paruk pawh inkhel kualin relegate tur an zawng ve dawn bawk.
Engtin
Tun season I League khelh tur hian engti zawng emaw takin ngaihven a hlawh a, a chhan chu he league-a champion-in ISL an khelh theihna dan siam a lo nih tawh vang a ni.
Asian Football Confederation (AFC) leh All India Football Federation (AIFF) ten kum 2019-a Indian football kalphung tur an duan khan kum 2022-ah I League champion-in ISL an khelh tur thu tarlan a ni a, hei mai a ni lo - 2024-25 season aṭang chuan relegation leh promotion awm tura tih a ni bawk. ISL lam hian an kalpui tak tak ngam ang em, tih erawh zawhna a awm mek.