Tlan chak lar Quinonez an kap hlum

Ecuadorean infiammi zinga hriat hlawh ber pawl Alex Quinonez chu kah hlum a ni a, Guayaquil khawpuia shopping centre pakhat pawna an awm laiin mi pakhat nen kah an ni.

He thu buatsaih a nih lai hian Quinonez kah a nih chhan hi a la chiang lo a, Ecuador president Guillermo Lasso chuan an ram infiammi hmingthang kap hlumtute chu an zawnchhuah vat tur thu leh hremna na tak pek an nih tur thu a sawi.

Kar hmasa khan Ecuador-a tharum thawhna hluar nasat avangin president Guillermo chuan ni 60 chhung ram pumpui huap state of emergency a lo puang tawh a, official lam tarlan danin kumin January - August chhunga Ecuador-a inthahna thleng hi nikum thla riat chhunga thleng zat nena khaikhinin a let a tling tawh.

Ecuador Sports Ministry chuan, "Hrehawm ti tak chungin kan chhuan em em Alex Quinonez chu thah a ni tih kan puang e. Infiammi ropui tak, beiseina min petu leh mi kaihruaitu chu kan chân ta. He ramina intlansiaka hming chher a neih ropui ber a ni," an ti.

Kum 32 mi Quimonez hian South American infiamna khawvelah chuan medal a lo la nual tawh a, khawvel huapah chuan kum 2019 khan World Athletics Championships, Doha-ah 200 metre intlansiakah bronze medal a la.

Quinonez thihna hi tun thla chhunga khawvel huap infiammi lar an thah pahnihna a ni a, Kenyan long-distance runner lar Agnes Tirop chu an inah vih hlum a ni a, rinhlelh thilah a pasal man a ni tawh.