Champion lai Windies an mualpho

T20 Cricket World Cup-ah champion lai West Indies bul an ṭan fuh lo a, Inrinni zan khan England lakah mualpho takin an chak lo.

Dubai International Stadium-ah England in vawm hmasak an thlang a, Windies hian Chris Gayle (13), Shimron Hetmyer (9), Evin Lewis (6) leh Kieron Pollard (6) te kawl mah se over 14.2 lekah 55 runs siamin an thi vek.

England tan Adil Rashid a che ṭha thlawt a, run hnih lek pein wicket li a la. Moeen Ali pawhin wicket hnih a la a, 17 runs chauh a pe bawk.

Three Lions target a hniam a, chak turin harsatna tur a awm lo. Chutihrualin Jason Roy (11), Jonny Bairstow (9), Moeen Ali (3) leh Liam Livingstone (1) te chu run tam siam loin an thi hman. Opener Jos Buttler (24) leh captain Eoin Morgan (7) te a tawp an thleng a, over 8.2 lekah target an umpha.

Windies captain Kieron Pollard chuan, "Insawifiah theih pawh a ni lo. Kan khelh chhiat ṭum a ni a, kan khelh dan hi theihnghilh mai a, match hmabak atana rilru sen a ṭha ang," tiin a sawi.