Australia an chak nghal

T20 Cricket World Cup-ah Australia-in an match hmasa berah South Africa wicket ngain an hneh. Proteas hian bat hmasain 118/9 runs an siam a, Aussies hian over 19.4-ah 121/5 runs siamin target an umpha a ni.

Sheikh Zayed Stadium-ah ṭhumvawra vannei Australia-in vawm hmasak an thlang. South Africa top order te che ṭha tawk lo mah se Aiden Makram-a'n 40 runs a siam bakah bowler ṭha mi Kagiso Rabada-a'n thi loa 19 runs a siam avangin 118/9 runs an siam hram.

Australia opener leh captain Aaron Finch-a'n run siam loin pavilion-ah a let a, inkhel pawh a nung hle. Aussies player an che ṭha rual a, Steve Smith-a'n 35 runs a siam bakah Marcus Stoinis (24) leh Matthew Wade (15) te hmangin over 19.4-ah 121/5 runs siamin target an umpha.

Aussies captain Aaron Finch chuan, "Inkhel tawp lam boruak a sang a, Stoinis leh Wade ten a tawp min thlenpui. Chutihrualin bowling lamah Glenn Maxwell a vawm ṭha tih ka zep tel duh bawk," tiin a sawi.

South Africa captain Temba Bavuma chuan, "Australia bowler te an che ṭha a, awlsam taka vuak theih tur ang kha an nei meuh lo. Batting lamah pawh an ṭang rei thei hle. Chutihrualin chak lo mah ila, kan khelh danah lawmna tur a awmin ka hria," tiin a sawi.