Thawhthu thar nen Ibra a lo kir

Zlatan Ibrahimovic a nih tawh chuan thawnthu ngaihnawmin a zui ṭhin. Hliam vanga a chawlh reng hnuah Ibra a lo kir leh ta a, tun season chhunga a match hmasa berah Ibra hian goal, assist leh own goal a nei nghal.

Inrinni zan Italian Serie A inkhelah AC Milan chuan Bologna 4-2 in an hneh a, mualneitu Bologna hi an player pahnih - Adama Soumaoro leh Roberto Soriano te hnawhchhuah an ni a, huaisen takin bei let mah se tih theih an nei tam lo.

Milan tan Rafael Leao chuan minute 16-naah goal hmahruai a khung a, a siamsaktu chu Ibrahimovic a ni - a hnu lawkah Soumaoro an hnawt chhuak, mikhual Milan lamin goal an neih bakah player tam zawk an nih avangin chak tur a chianga ngaih a ni.

Kum 40 mi Ibra hian second half tir lamah anmahni lamah a ti lut palh, football a khelh hun chhungin own goal a neih hmasak ber a ni. A tihsual thup nan hian hun tawp dawnah goal a khung - Ibra bakah Davide Calabria leh Ismael Bennacer ten Milan tan goal an khung ve bawk.

Goal khungtu Ibra hi kum 40 leh ni 20 a upa a ni tawh a, Italian football inelna sang berah hian goal khung thei upa palina a ni. A chungah hian Pietro Vierchowod (kum 40 leh ni 47), Silvio Piola (kum 40 leh ni 131) leh Alessandro Costacurta (kum 41 leh ni 25) te an la awm.

Milan manager Stefano Pioli chuan, "Player tam zawk kan nih khan 2-0 in hma kan hruai bawk, harsa vak loa chak thei kan ni. Mahse, kan khingpui khan thapui an thawh tak meuh a, a nihna takah chuan kan talbuai hman viau.

"Player pakua an nih hnuah phei kha chuan keimahni lam rilru pawh a dik tawk tawh lo, a harsa letling tawh zawk," tiin a sawi a, inkhel harsa ni mah se a pawimawh ber point thum an hmuh theih avanga a lawm thu a sawi bawk.

Milan hian Serie A match kua an khelh aṭangin point 25 an hmu a, table chung berah an awm. Nikum pawh khan season chawhma lamah chuan hmahruaitu an ni zak zak a, season chawhnu lamah an zuih - nomawi chawi an duh a nih chuan season tluana khelh ṭhat a ngai dawn.